Сирский НАТОда Украина қуролли кучларининг янги уруш тактикасини очиқлади
Украина қуроли кучлари қўмондони НАТО минбарида уруш олиб бориш ёндашуви тубдан ўзгаргани ва бу ўзгариш Россия ҳудудига зарбаларга ҳам тааллуқли эканини таъкидлади.
Украина Қуролли кучлари бош қўмондони Олександр Сирский НАТО Ҳарбий қўмитаси доирасида ўтган Стратегик мулоқотда Украина ҚК уруш олиб бориш фалсафасини ўзгартираётганини маълум қилди. Унинг таъкидлашича, Украина армияси энди оммавий ўт очиш узиш ва «майдонлар бўйлаб» зарбалар беришдан воз кечиб, аниқ нишонларни арзон воситалар орқали уриш тактикасига ўтмоқда.
Сирскийнинг Украинадаги урушни локал тўқнашув эмас, балки глобал хавфсизлик келажаги ҳал бўлаётган майдон деб атади.
«Украинадаги уруш — Европа шарқидаги локал можаро эмас. Бу ерда глобал хавфсизликнинг келажаги ҳал бўлмоқда. Бугунги кунда Покровск, Купянск ёки Қора денгиз акваториясида содир бўлаётган воқеалар эртанги кунда евроатлантика армияларининг ёндашувлари ва хатти-ҳаракатларини белгилаб беради», — деди Сирский.
Қўмондон НАТО ҳамкорларини замонавий уруш тез суръатларда ўзгараётган ҳодиса сифатида қабул қилишга чақирди.
Технология ва аниқлик
Сирскийнинг таъкидлашича, Украина ҚКнинг асосий устунлигии технология ва марказсизлашувга таянади. Янги ёндашувга кўра, бир дроннинг ўртача қиймати 500 доллар атрофида бўлса, у йўқ қилаётган нишон қиймати миллионлаб долларларга тенг бўлиши мумкин. Бу эса иқтисодий ва ҳарбий самарадорликни кескин оширади.
Унинг сўзларига кўра, радиоэлектрон кураш (РЭК) соҳасида устунлик ёки камида паритет бўлмаса, энг замонавий қуроллар ҳам самарасиз темирга айланади. Шу сабабли Украина армияси техника учун «РЭК гумбази», пиёдалар учун эса окоп РЭК тизимларини жорий қилган.
Йўқотишлар ва чақириқ
Сирскийнинг маълум қилишича, 2025 йил давомида айнан технологик ечимлар ҳисобига Украина ҚК умумий йўқотишларни 2024 йилга нисбатан 13 фоизга қисқартиришга эришган. У Россия Ғарб урушдан толиқиб қолиши ва Украина инсон ресурслари тугашига умид қилаётганини ҳам қайд этди.
Қўмондон НАТО давлатларини Украинани фақат «керагича қўллаб-қувватлаш» билан чекланмасликка чақириб, агрессорни тез ва қатъий тўхтатиш учун аниқ ҳарбий-технологик воситалар тақдим этиш зарурлигини таъкидлади.
