«Temiryo‘linfratuzilma» ustav kapitalini qisqartirib, oktabr qarorini bekor qildi
«Temiryo‘linfratuzilma» aksiyadorlari ustav kapitalini 1,35 mlrd so‘mga kamaytirishga va 2025 yil oktabrda qabul qilingan qarorlardan birini bekor qilishga qaror qildi.
«Temiryo‘linfratuzilma» AJ aksiyadorlarining 2025 yil 16-dekabrdagi navbatdan tashqari umumiy yig‘ilishi kompaniya ustav kapitalini 1 353 886 205 so‘mga kamaytirish hamda uning yangi miqdorini 371 299 796 000 so‘m etib belgilash to‘g‘risida qaror qabul qildi.
Yig‘ilish, shuningdek, 2025 yil 30-oktabrdagi navbatdan tashqari umumiy yig‘ilish bayonnomasining 3-masalasi bo‘yicha qarorni bekor qildi hamda korporativ axborot portalida joylashtirilgan 6-sonli muhim faktni bekor qilish choralari ko‘rilishini aytib o‘tdi.
Yig‘ilishda kvorum 85 foizni tashkil etdi. Ustav kapitalini kamaytirish masalasi bo‘yicha qaror 100 foiz «ha» ovozi bilan qabul qilindi. Kuzatuv kengashi masalalarida esa ovoz berish natijalari nisbatan farq qildi. Kuzatuv kengashi to‘g‘risidagi nizomni yangi tahrirda tasdiqlash masalasida 70,59 foiz «ha» va 29,41 foiz betaraf ovoz qayd etildi. Shuningdek, Kuzatuv kengashi a’zolari sonini 9 taga yetkazish va yangi tahrirdagi Ustavni tasdiqlash bo‘yicha qarorlar ham qabul qilindi.
Ustav kapitalining 1,35 mlrd so‘mga qisqartirilishi yangi ustav kapitaliga nisbatan taxminan 0,36 foizni tashkil etadi. Miqdor jihatidan bu katta ko‘rsatkich bo‘lmasa-da, qabul qilingan qarorlar, ayniqsa, oktabr oyidagi qarorning bekor qilinishi kompaniyada ayrim korporativ parametrlar qayta ko‘rib chiqilayotganini ko‘rsatadi.
Hujjatda 30-oktabr yig‘ilishining 3-masalasi mazmuni batafsil keltirilmagan. Shu sababli mazkur qarorning bekor qilinish sababi bo‘yicha aniq xulosa chiqarish uchun yetarli asos mavjud emas. Biroq 16-dekabr bayonnomasida ushbu qaror bekor qilingani va portalda e’lon qilingan 6-sonli muhim faktni bekor qilish choralari ko‘rilishi ochiq qayd etilgan.
Bayonnomadagi yana bir muhim bandga ko‘ra, ijroiya organiga kamaytirilgan 1,35 mlrd so‘m miqdoriga mutanosib qo‘shimcha aksiyalar chiqarish masalasini navbatdagi umumiy yig‘ilish kun tartibiga kiritish vazifasi topshirilgan. Bu joriy qaror kapital tuzilmasi bo‘yicha yakuniy nuqta emasligini va navbatdagi bosqichda qo‘shimcha emissiya parametrlarini muhokama qilish rejalashtirilayotganini anglatadi.
G.Bozorova tayyorladi.
