19,5 mingdan ortiq ukrainalik bolalar Rossiya tomonidan o‘g‘irlangan

Rasmiy ma’lumotlarga ko‘ra, Rossiya tomonidan 19 500 nafardan ortiq ukrain bolasi o‘g‘irlangan. Ukraina rahbariyati ularni qaytarish masalasini tinchlik muzokaralarida asosiy talab sifatida ilgari surmoqda. 2025 yil 2 iyun kuni Istanbulda o‘tgan muzokaralarda Rossiya delegatsiyasiga 339 nafar bola nomi kiritilgan ro‘yxat taqdim etildi. Biroq Rossiya bu bolalarni «yevakuatsiya qilingan» deb ataydi. Vladimir Medinskiy boshchiligidagi delegatsiya bu talablarni «yevropalik buvijonlar uchun sahnalashtirilgan namoyish» sifatida masxara qildi. Uning bayonoti Rossiyaning jinoyatni tan olmaslik va xalqaro huquq me’yorlarini o‘zgartirishga urinishini yana bir bor namoyon qildi. Ushbu siyosatning ikki asosiy maqsadi bor: Birinchisi — Rossiya bu harakatlarini «qutqarish» deb taqdim etib, abduksiya va majburiy ko‘chirish kabi urush jinoyatini normal holga keltirishga urinadi. Bu — Jeneva konvensiyasi va Rim statutida kafolatlangan bolalar huquqlariga ochiqdan-ochiq tajovuzdir. Ikkinchisi — Rossiya o‘z strategik aldamchiliklarini keng tarqatib, jinoyatlarini yashirish va kelgusida rad etish uchun «axborot alibi» yaratadi. Bunday yolg‘onlar nafaqat dunyo jamoatchiligini chalg‘itadi, balki haqiqiy jinoyatni jazosiz qoldirishga xizmat qiladi. «The Reckoning Project» tashkiloti ikki yildan beri ukrain bolalarni o‘g‘irlashga oid guvohliklarni yig‘moqda. Hisobotlarda bolalarning rus ismlari va pasportlari olishi, rus tili va tarixini o‘rganishga majbur qilinishi, hatto harbiy tayyorgarlik va «Yunarmiya» singari lagerlarga jalb etilishi tasdiqlangan. Bu bolalar o‘z millatiga qarshi qurol sifatida tayyorlanayotgani shubhasiz. Xalqaro hamjamiyat uchun bu yerda uchta ustuvor vazifa bor: 1.Bolalarni o‘g‘irlash jinoyatini tergov qilish va javobgarlikni ta’minlash uchun xalqaro resurslar ko‘lamini kengaytirish. 2. O‘g‘irlangan bolalarni qaytarish uchun xalqaro bosimni kuchaytirish. Jurnalistik surishtiruvlar va jamoatchilik tanqidlari natija berishi mumkin. 3. Yevropa Ittifoqidan tashqari mamlakatlarda ham javobgarlikka chaqiruvni keng targ‘ib etish. Ukraina bolalarining taqdiri insonparvarlik masalasi bilan cheklanmaydi. Bu — javobgarlik va jazoning umumjahon tizimi uchun sinovdir. Agar dunyo Rossiyaning strategik aldamchiligiga ko‘z yumsa, bu kelgusida yanada xatarli jinoyatlarga yo‘l ochadi.