Dnipro sohilida qurshovda qolgan rus askarlari ochlikdan halok bo‘layotgani aytilmoqda

Ukrainadagi Dnipro daryosi orollarida boshqa qo‘shinlardan butunlay uzilib qolgan yuzlab rus askarlari ochlik va chanqoqlikdan halok bo‘lgani ma’lum qilindi. Ukraina razvedkasi hisobotida qayd etilishicha, 2025 yil yanvaridan beri kamida 5100 rus harbiysi halok bo‘lgan — ularning ayrimlari Ukraina zarbalari oqibatida, qolganlari esa ovqat va ichimlik suvi yetishmasligi sababli.

Xerson shahri Ukraina tomonidan 2022 yil noyabrida ozod qilinganidan keyin Dnipro daryosi yangi front chizig‘iga aylangan. Daryoning o‘ng sohili Ukraina, past va toshqin xavfi yuqori bo‘lgan so‘l sohili esa Rossiya nazoratida qolgan. Oraliqdagi botqoq orollar esa rus askarlari uchun halokatli tuzoqqa aylangan.

Ukraina dengiz piyodalari polkovnigi Oleksandr Zavtonov bu hududni «rus askarlari uchun o‘lim zonasi» deb atadi. Uning so‘zlariga ko‘ra, «ularning yashirinadigan joyi ham yo‘q». Videoyozuvlarda askarlar botqoqlikda qamish va suvo‘tlar bilan kamuflyajlanib, kichik qayiqlarda qochishga uringani aks etgan. Biroq Ukraina dronlari ularni tezda aniqlab, hujumga uchratgan.

Ukraina xavfsizlik va hamkorlik markazi vakili Oksana Kuzanning ta’kidlashicha, Dnipro deltasidagi rus bo‘linmalari oziq-ovqat, o‘q-dori va yordam yetishmasligi bilan kurashmoqda. Uning aytishicha, kichik guruhlar bilan amalga oshirilayotgan yashirincha suzib o‘tish harakatlari — urush boshida kuzatilmagan yangi taktik usul hisoblanadi.

Delta orollari Ukraina uchun razvedka va aloqa nuqtalari sifatida ahamiyat kasb etsa-da, past va ochiq hudud bo‘lgani sababli askarlar osonlikcha nishonga aylanmoqda. Natijada, Dnipro sohillari Rossiya uchun halokatli tuzoqqa, Ukraina uchun esa muhim strategik kuzatuv nuqtasiga aylangan.