Экспортчиларни қўллаб-қувватлаш учун 1 млрд доллар йўналтирилади

Шавкат Мирзиёев бошчилигида Хоразмда ўтказилаётган тадбиркорлар билан очиқ мулоқотда экспорт салоҳиятини ошириш ва миллий брендларни ташқи бозорларга олиб чиқиш масаласи алоҳида муҳокама қилинди.

Президент бугун ташқи бозорларда ҳар бир долларлик экспорт учун кескин рақобат кетаётганини таъкидлади.

Ўрганишларга кўра, экспортчиларнинг 40 фоизи хорижлик мижоз топишга қийналмоқда.

Шунингдек, 36 фоиз корхона стандарт ва сертификация талабларига мослашишда муаммога дуч келмоқда. 37 фоизида қулай молиявий инструментлар, 33 фоизида эса бозор, маркетинг ва бренд бўйича етарли кўникмалар мавжуд эмас.

Шу боис ташқи бозорга чиқишнинг барча босқичларида комплекс хизмат кўрсатадиган «экспорт навигатор» тизими жорий этилади. Унинг доирасида экспортчиларни қўллаб-қувватлашнинг ягона тизимига камида 1 миллиард доллар йўналтирилади.

Экспорт учун 100 та маҳсулот танланади

Шунингдек, хорижий бозорларда талаб юқори бўлган 100 та маҳсулот рўйхати шакллантирилади. Ҳар бири бўйича рақобатчилар, тариф тизими ва логистика ечимлари таҳлил қилиниб, тадбиркорларга тайёр йўналишлар таклиф этилади.

Шунингдек, 2 мингта корхонанинг ишлаб чиқариш жараёни ташқи бозор ва аниқ харидор сегменти талабларига мослаштирилади.

Тадбиркорларга хорижий брендмейкер жалб қилиш харажатининг ярми, 500 минг долларгача қоплаб берилади. Миллий брендларни ташқи бозорда тарғиб қилиш ва халқаро талабларга мослаштириш учун эса 50 минг долларгача субсидия ажратилади.

Маркетплейсларда омборга жойлаштириш ва сотиш харажатининг ярми, халқаро тендерларда иштирок этиш учун консалтинг харажатларининг 80 фоизи ҳам компенсация қилинади.

Экспортга янги енгилликлар

«Бугун дунёда бозор учун кураш кун саин кучайиб боряпти. Бундай вазиятда хорижга чиққан тадбиркор ҳеч қачон ўзини ёлғиз ҳис қилмаслиги керак», – деди Президент.

Экспортнинг 60 фоизи тўғри келадиган 20 та давлат ва истиқболи юқори яна 5 мамлакатда «экспорт элчилари» фаолияти йўлга қўйилади. Уларни ўша бозорга энг кўп маҳсулот экспорт қилаётган тадбиркорларнинг ўзи сайлайди.

«Экспорт элчилари» бошқа тадбиркорларга савдо тармоқлари, сертификатлаш ва маркетинг масалаларида кўмаклашади. Уларнинг хизмат сафари ва яшаш харажатлари қоплаб берилади.

Экспортда муддати ўтган қарздорлик бўйича ҳам енгилликлар жорий этилади. Товар учун тўлов келмаган тақдирда экспортга чеклов бекор қилинади, инвойс бўйича 50 фоиз олдиндан тушум талаби олиб ташланади.

Савдо уйлари ва дистрибьюторлар орқали экспортда валюта тушумини таъминлаш муддати 180 кундан 365 кунга узайтирилади.