«Темирйўлинфратузилма» устав капиталини қисқартириб, октябр қарорини бекор қилди
«Темирйўлинфратузилма» акциядорлари устав капиталини 1,35 млрд сўмга камайтиришга ва 2025 йил октябрда қабул қилинган қарорлардан бирини бекор қилишга қарор қилди.
«Темирйўлинфратузилма» АЖ акциядорларининг 2025 йил 16 декабрдаги навбатдан ташқари умумий йиғилиши компания устав капиталини 1 353 886 205 сўмга камайтириш ҳамда унинг янги миқдорини 371 299 796 000 сўм этиб белгилаш тўғрисида қарор қабул қилди.
Йиғилиш, шунингдек, 2025 йил 30 октябрдаги навбатдан ташқари умумий йиғилиш баённомасининг 3-масаласи бўйича қарорни бекор қилди ҳамда корпоратив ахборот порталида жойлаштирилган 6-сонли муҳим фактни бекор қилиш чоралари кўрилишини айтиб ўтди.
Йиғилишда кворум 85 фоизни ташкил этди. Устав капиталини камайтириш масаласи бўйича қарор 100 фоиз «ҳа» овози билан қабул қилинди. Кузатув кенгаши масалаларида эса овоз бериш натижалари нисбатан фарқ қилди. Кузатув кенгаши тўғрисидаги низомни янги таҳрирда тасдиқлаш масаласида 70,59 фоиз «ҳа» ва 29,41 фоиз бетараф овоз қайд этилди. Шунингдек, Кузатув кенгаши аъзолари сонини 9 тага етказиш ва янги таҳрирдаги Уставни тасдиқлаш бўйича қарорлар ҳам қабул қилинди.
Устав капиталининг 1,35 млрд сўмга қисқартирилиши янги устав капиталига нисбатан тахминан 0,36 фоизни ташкил этади. Миқдор жиҳатидан бу катта кўрсаткич бўлмаса-да, қабул қилинган қарорлар, айниқса, октябр ойидаги қарорнинг бекор қилиниши компанияда айрим корпоратив параметрлар қайта кўриб чиқилаётганини кўрсатади.
Ҳужжатда 30 октябр йиғилишининг 3-масаласи мазмуни батафсил келтирилмаган. Шу сабабли мазкур қарорнинг бекор қилиниш сабаби бўйича аниқ хулоса чиқариш учун етарли асос мавжуд эмас. Бироқ 16 декабр баённомасида ушбу қарор бекор қилингани ва порталда эълон қилинган 6-сонли муҳим фактни бекор қилиш чоралари кўрилиши очиқ қайд этилган.
Баённомадаги яна бир муҳим бандга кўра, ижроия органига камайтирилган 1,35 млрд сўм миқдорига мутаносиб қўшимча акциялар чиқариш масаласини навбатдаги умумий йиғилиш кун тартибига киритиш вазифаси топширилган. Бу жорий қарор капитал тузилмаси бўйича якуний нуқта эмаслигини ва навбатдаги босқичда қўшимча эмиссия параметрларини муҳокама қилиш режалаштирилаётганини англатади.
Г.Бозорова тайёрлади.
