Трамп уруш қанча давом этишини маълум қилди

АҚШ президенти Доналд Трамп Эрон ҳудудида олиб борилаётган ҳарбий операция тахминан тўрт ҳафта ёки ундан кам давом этиши мумкинлигини маълум қилди. У бу ҳақда «Daily Mail» нашрига берган интервюсида айтди.

Президентнинг сўзларига кўра, операция дастлабдан тўрт ҳафталик жараён сифатида режалаштирилган

«Бу катта давлат, шунинг учун тўрт ҳафта керак бўлади ёки камроқ», — деди у.

Трамп шу пайтгача АҚШ ва Исроил томонидан амалга оширилган зарбалар натижасидан ҳайратланмаганини, жараён режа асосида кетаётганини таъкидлади.

Зарбалар натижасида Эрон раҳбариятининг катта қисми йўқ қилинган

«Назаримда, ҳаммаси режа бўйича кетмоқда. Биз уларнинг бутун раҳбариятини йўқ қилдик, бу биз ўйлагандан анча кўпроқ. Тахминан, 48 киши шекилли»— деди АҚШ раҳбари.

Трамп Эрон билан кейинги музокараларга тайёр эканини билдирган бўлса-да, улар яқин вақт ичида ўтказилиши ёки йўқлиги борасида аниқ жавоб бермади. Унинг таъкидлашича, Теҳрон музокара истагини билдирган, аммо бу масала олдинроқ кўтарилиши керак эди.

Шунингдек, президент Кувайтда 1 март куни ҳалок бўлган уч нафар америкалик ҳарбий хизматчи учун «қасос олиш»га ваъда берди. У Мар-а-Лаго қароргоҳидан туриб сўзлар экан, Эронни янги ултиматум билан огоҳлантирди ва мамлакатни «сивилизацияга қарши уруш» олиб бораётган кучлар деб атади.

Трамп Эрон раҳбариятини Яқин Шарқдаги кескинликни кучайтирган ҳаракатлардан воз кечишга чақирди

«Бу чидаб бўлмас таҳдидлар энди давом этмайди. Мен Инқилобий гвардия корпуси ва Эрон ҳарбий полициясини яна бир бор қуролларини топшириб, тўлиқ дахлсизликка эга бўлишга ёки муқаррар ўлимга юз тутишга даъват этаман», деди президент.

Шу билан бирга, президент Эрон халқини ҳукуматга қарши қўзғолонга чақириб, америкаликларни операцияни қўллаб-қувватлашга ундади. Унинг айтишича, бу ҳаракатлар АҚШ ва келажак авлодлар хавфсизлигини таъминлашга қаратилган.

«Жасур бўлинг, дадил бўлинг, қаҳрамонлик кўрсатинг ва мамлакатингизни қайтариб олинг», деди у Эрон халқига.