Vietnamda dunyoning eng katta stadioni quriladi
Vietnamda qurilishi boshlangan 135 ming o‘rinli «Trong Dong» stadioni 2028 yilda ochilishi rejalashtirilmoqda va u jahondagi eng yirik sport inshootiga aylanishi kutilmoqda.
Vietnam sport infratuzilmasida tarixiy qadam qo‘ymoqda. 2025 yil dekabr oyida qurilishi boshlangan «Trong Dong» stadioni to‘liq yakunlangach, 135 ming tomoshabin sig‘imi bilan dunyodagi eng katta stadion maqomini oladi. Loyihani 2028 yilda foydalanishga topshirish rejalashtirilgan.
Stadion nafaqat milliy sport ehtiyojlarini qondirish, balki Vietnamni xalqaro sport va madaniy tadbirlar uchun Osiyodagi yirik markazlardan biriga aylantirish maqsadini ham ko‘zlaydi. Rasmiylar ta’kidlashicha, ushbu investitsiya mamlakatning global sport maydonidagi da’vosini namoyon etuvchi strategik loyiha hisoblanadi.
Loyiha xalqaro standartlar asosida ishlab chiqilgan. Qurilishda FIFA, AFC hamda Osiyo Olimpiya kengashi talablari inobatga olingan bo‘lib, bu stadion kelajakda yirik musobaqalarni qabul qilish imkonini beradi.
Xalqaro musobaqalarga tayyor
«Trong Dong» stadioni infratuzilmasi Olimpiya o‘yinlari, Osiyo o‘yinlari, FIFA va qit’aviy musobqalar kabi nufuzli musobaqalarni o‘tkazishga moslab loyihalashtirilgan. Shu jihati bilan u Marokashda qurilayotgan 120 ming o‘rinli «Grand Stade Hassan II» stadionidan ham kattaroq bo‘ladi.
Loyihada qaytarib yopiladigan tom tizimi nazarda tutilgan. Bu esa stadionni nafaqat sport musobaqalari, balki konsertlar, festivallar, madaniy tadbirlar va ommaviy yig‘inlar uchun ham yil davomida foydalanish imkonini beradi.
Mutaxassislarning fikricha, ko‘p funksiyali format stadionning iqtisodiy samaradorligini oshiradi va uning doimiy daromad manbaiga aylanishini ta’minlaydi.
Madaniy ramz sifatida
Stadion arxitekturasida Vietnam milliy merosiga alohida urg‘u berilgan. «Trong Dong» — «bronza baraban» ma’nosini anglatib, inshoot shakli qadimgi «Dong Son» sivilizatsiyasining bronza barabanlaridan ilhomlangan.
Vietnam hukumati loyihani taqdim etar ekan, stadion faqat sport inshooti emas, balki yangi davrda mamlakatni ifodalovchi me’moriy va madaniy ramz sifatida qaralayotganini ta’kidladi. Rasmiy bayonotga ko‘ra, maqsad — Vietnamni jahon xaritasida zamonaviy va ochiq davlat sifatida namoyon etish.
