Европа АҚШга қарши 93 млрд евролик бож зарбасини тайёрламоқда
Гренландия бўйича Трамп босими кучайган бир пайтда, Европа Иттифоқи АҚШга қарши тарихда илк бор кенг қамровли иқтисодий жавоб чораларини муҳокама қилмоқда.
© Фото: ft.com Европа Иттифоқи АҚШга нисбатан мисли кўрилмаган иқтисодий қарши чоралар пакетини ишлаб чиқмоқда. «Financial Times» нашрининг хабар қилишича, Брюссел умумий қиймати 93 млрд еврога тенг бўлган америкалик товарларга бож жорий этиш, шунингдек, АҚШ компанияларининг ягона Европа бозорига киришини чеклаш имкониятларини кўриб чиқмоқда. Кескинликка сабаб — АҚШ президенти Доналд Трампнинг Гренландия масаласидаги қатъий талаби ва НАТО иттифоқчиларига нисбатан бож таҳдидларидир.
Трамп 1 февралдан Буюк Британия, Норвегия дохил Европа Иттифоқининг олти давлати маҳсулотларига 10 фоизлик бож жорий этилишини маълум қилди. Ушбу давлатлар Вашингтоннинг Гренландияни АҚШ назоратига ўтказиш ғоясини қўллаб-қувватламаган.
ЕИ жавоб чораларини Жаҳон иқтисодий форуми арафасида босим воситаси сифатида тайёрламоқда. Давосда Европа етакчилари билан Трамп ўртасида музокаралар режалаштирилган. Брюсселнинг асосий мақсади — Оқ уйни муроса қилишга мажбур этиш ва Ғарб ҳарбий иттифоқида хавфли бўлинишнинг олдини олиш. Манбаларга кўра, божлар рўйхати ўтган йилиёқ шакллантирилган, аммо уни амалга ошириш 6 февралга қадар кечиктирилган.
Муҳокамаларда 2023 йилда қабул қилинган, аммо ҳали қўлланилмаган «иқтисодий мажбурлашга қарши восита»дан фойдаланиш ҳам кўриб чиқилди. У Брюсселга чет эл компанияларининг ЕИ бозорига киришини чеклаш, инвестицияларни блоклаш ва хизматлар экспортини тўсиш ҳуқуқини беради. Ички ҳужжатларда бу механизм АҚШ технологик гигантларига нисбатан ҳам ишлатилиши мумкинлиги қайд этилган.
Геосиёсий кескинлик молия бозорларида ҳам акс этди: Euro Stoxx 50 фьючерслари 1,5 фоизга пасайди, олтин эса унциясига 4690 долларлик нархга чиқиб, тарихий рекорд ўрнатди.
