7 millionga yaqinlashgan o‘rtacha ish haqi, ekologiyaga 8,5 milliard so‘mdan ortiq zarar va har uchtadan bittasi ajralish bilan tugayotgan nikohlar — 28-aprel dayjesti

Ishdagi baxtsiz hodisalar: uch oyda 62 kishi ish joyida halok bo‘ldi

2026 yilning birinchi choragida O‘zbekistonda ish joylari bilan bog‘liq 198 ta baxtsiz hodisa qayd etildi. Kambag‘allikni qisqartirish va bandlik vazirligi ma’lumotiga ko‘ra, ushbu holatlarda 223 nafar fuqaro jabrlangan bo‘lib, 62 nafari halok bo‘lgan, 146 nafari og‘ir tan jarohati olgan. Hodisalarning katta qismi sanoat (71 ta) va qurilish (54 ta) sohalari hissasiga to‘g‘ri kelgan.

Hududlar kesimida eng ko‘p baxtsiz hodisa Toshkent shahrida (44 ta) qayd etilgan. Keyingi o‘rinlarda Surxondaryo (36 ta), Toshkent viloyati (29 ta), Navoiy (18 ta), Buxoro (16 ta) va Andijon (15 ta) turibdi. Qolgan hududlarda ham turli miqdorda shunday holatlar kuzatilgan.

Vazirlik mehnat xavfsizligini ta’minlash har bir ish joyida ustuvor vazifa bo‘lishi kerakligini ta’kidladi. Eslatib o‘tamiz, 2025 yilda ish joylaridagi baxtsiz hodisalar oqibatida 248 nafar inson halok bo‘lgan.

O‘zbekistonda o‘rtacha ish haqi 7 mln so‘mga yaqinlashdi

2026 yilning birinchi choragida O‘zbekistonda o‘rtacha oylik ish haqi 6,8 mln so‘mga yetdi. Milliy statistika qo‘mitasi ma’lumotiga ko‘ra, bu ko‘rsatkich o‘tgan yilga nisbatan 17,4 foizga o‘sgan. Shu bilan birga, hududlar va sohalar kesimida maoshlar o‘rtasida katta farq saqlanib qolmoqda.

Hududlar bo‘yicha eng yuqori ish haqi Toshkent shahrida — 11,6 mln so‘m, eng pasti esa Qashqadaryo viloyatida — 4,6 mln so‘mni tashkil etgan. Shuningdek, Surxondaryoda ham maoshlar nisbatan past darajada qolgan, Navoiy viloyati esa yuqori ko‘rsatkichlar bilan ajralib turadi. Natijada, poytaxt va ayrim hududlar o‘rtasidagi farq 2,5 baravardan oshgan.

Sohalar kesimida eng yuqori maoshlar moliya va bank tizimida (18,5 mln so‘m) hamda IT sohasida (16,5 mln so‘m) qayd etilgan. Tashish va saqlashda o‘sish sur’ati yuqori bo‘lgan, sanoat, savdo va qurilishda o‘rtacha ko‘rsatkichlar saqlangan. Eng past maoshlar esa sog‘liqni saqlash va ta’lim sohalarida qayd etilgan.

Samarqandda gaz to‘ldirish shoxobchalari jarimaga tortildi

Samarqand viloyati Payariq tumanidagi siqilgan gaz to‘ldirish shoxobchalarida metan narxini asossiz oshirish holati aniqlandi. Raqobat qo‘mitasi ma’lumotiga ko‘ra, 12 ta shoxobchaning 11 tasi 5-yanvardan boshlab gaz narxini bir vaqtda o‘rtacha 300 so‘mga oshirgan.

Tekshiruvda ushbu shoxobchalar 8 ta kompaniyaga tegishli ekani ma’lum bo‘lib, aholidan kelgan murojaatlar asosida monitoring va so‘rovlar o‘tkazilgan. Tahlillar narx oshirish holati muvofiqlashtirilgan tarzda amalga oshirilganini ko‘rsatgan.

Natijada, holat «Raqobat to‘g‘risida»gi qonun talablarini buzish sifatida baholanib, ish qo‘zg‘atildi va mas’ullarga nisbatan moliyaviy jarima qo‘llash bo‘yicha qaror qabul qilindi.

Boysunda daryoga oqqan neftning ekologiyaga yetkazilgan zarar miqdori ma’lum qilindi

Surxondaryo viloyati Boysun tumanida sodir bo‘lgan hodisa oqibatida neft aralash suyuqlik daryoga oqib, ekologiyaga 8,5 mlrd so‘mdan ortiq zarar yetkazilgani ma’lum qilindi. «Surxan Gas Chemical Operating Com»ga qarashli quduqda sizib chiqqan suyuqlikni yig‘ish choralari ko‘rilganiga qaramasdan, kuchli yog‘ingarchilik vaziyatni og‘irlashtirgan.

Natijada taxminan 1,2 tonna neft mahsulotlari «Xongaronsoy» orqali tarqalib, atrof-muhitga zarar yetkazgan. Hodisaga «Eriell Oilfield Services Middle East DMCC» texnikasi jalb qilinib, maxsus xandaqlar orqali oqimni cheklashga urinilgan.

Hisob-kitoblarga ko‘ra, yetkazilgan zarar 8,5 mlrd so‘mdan oshgan. Hozirda hudud tozalangan, holat bo‘yicha qo‘shimcha o‘rganish ishlari davom etmoqda va materiallar huquqni muhofaza qiluvchi organlarga yuborilishi kutilmoqda.

O‘zbekiston shaharlarida har uchta nikohdan bittasi ajralish bilan tugayapti

2026 yil I choragida O‘zbekistonda 42,3 mingta nikoh qayd etilgan bo‘lsa, ajralishlar soni 12,7 mingtani tashkil qildi. Milliy statistika qo‘mitasi ma’lumotiga ko‘ra, nikohlar o‘tgan yilga nisbatan kamaygan, ajralishlar esa oshgan. Bu esa oilalar barqarorligiga oid xavotirli tendensiyani ko‘rsatmoqda.

Hududiy kesimda farq sezilarli: shaharlarda ajralish/nikoh nisbati 37,6 foizni tashkil etib, deyarli har uchta nikohdan biri ajrim bilan tugayotgani ma’lum bo‘ldi. Qishloqlarda bu ko‘rsatkich pastroq — 23,1 foiz. Shu bilan birga, nikohlar soni yillar davomida kamayib borayotgani kuzatilmoqda.

Tahlillarga ko‘ra, ushbu tendensiya saqlanib qolsa, yaqin yillarda ajralishlar soni nikohlardan oshib ketishi mumkin. Shuningdek, demografik holatda ham o‘zgarishlar kuzatilib, tug‘ilishlar kamayib, tabiiy o‘sish sur’atlari pasaymoqda.