«BBC» taxminan 2 ming xodimini ishdan bo‘shatmoqda

«BBC» rahbariyati 1800dan 2000 nafargacha ish o‘rinlarini qisqartirishini e’lon qildi. Bu efir kompaniyasi xodimlarining umumiy sonining taxminan 10 foizini tashkil qiladi. Qaror kelasi ikki yil ichida 500 mln funt sterling tejash zarurati bilan izohlangan.

«BBC» bosh direktori vazifasini bajaruvchi sifatida Talfan Devis xodimlarga yo‘llagan maktubida «xarajatlar va daromadlar o‘rtasidagi farq ortib borayotganini» ta’kidladi. Uning so‘zlariga ko‘ra, bu inflatsiya, global iqtisodiyotdagi beqarorlik hamda litsenziya to‘lovlari va tijorat faoliyatidan tushadigan daromadlarning kamayishi bilan bog‘liq.

Talfan Devis qisqartirishlar natijasida ayrim telekanallar yoki xizmatlar yopilishi mumkinligini ham istisno qilmadi.

Hozirda «BBC»da taxminan 21,5 ming doimiy xodim ishlaydi. Buyuk Britaniya hududida korporatsiya faoliyati asosan aholi tomonidan to‘lanadigan televizion litsenziya orqali moliyalashtiriladi. Bu to‘lov televizor yoki raqamli signal qabul qilgichga ega bo‘lgan va efir teleko‘rsatuvlarini yoki «BBC» dasturlarini tomosha qiladiganlar uchun majburiy hisoblanadi.

«BBC World Service» (Jahon xizmati) qisman davlat grantlari hisobidan moliyalashtiriladi. Shuningdek, korporatsiya tijorat faoliyati bilan ham shug‘ullanadi.

«BBC» moliyaviy qiyinchiliklari, jumladan, televizion litsenziya to‘lovini amalga oshiradiganlar soni kamayib borayotgani bilan ham bog‘liq: texnologiyalar rivoji tufayli Britaniya uylarida televizorlar soni kamaymoqda. Hozirda korporatsiya o‘z kelajagi, shuningdek litsenziya to‘lovi taqdiri yuzasidan hukumat bilan muzokaralar olib bormoqda. Bu masala 2027-yil oxirida «Royal Charter renewal» yangilanishi arafasida ko‘rib chiqilmoqda.

«Biz hamma narsani qayta ko‘rib chiqishimiz kerak, va 500 million funtlik defitsit sharoitida katta va qiyin qarorlar qabul qilish muqarrar, lekin biz juda ehtiyotkorlik bilan harakat qilishimiz lozim», – dedi Talfan Devis «BBC Radio 4»dagi «Media Show» dasturida.

Uning aytishicha, o‘zgarishlar va qaysi xizmatlar ta’sirga uchrashi haqida batafsil ma’lumot bir yil ichida taqdim etiladi. Shuningdek, u auditoriya nuqtai nazaridan asosiy vazifa kelasi 3–4 oyda o‘zgarishlarni radio, televideniye va internetdagi eng muhim xizmatlarga zarar yetkazmasdan qanday amalga oshirish mumkinligini aniqlash ekanini ta’kidladi.

«Qiyin qarorlar»

Talfan Devis qisqartirishlar xodimlar uchun og‘ir sinov bo‘lishini tan oldi. Buyuk Britaniya madaniyat vaziri Liza Nendi esa «BBC» «har qanday boshqa tashkilot kabi», qiyin qarorlar qabul qilishga majbur ekanini bildirdi.

Uning aytishicha, «BBC» rahbariyati bu masalaga juda jiddiy yondashmoqda va moliyaviy barqarorlikni ta’minlash uchun tijorat imkoniyatlari hamda daromadni oshirishning boshqa yo‘llarini ko‘rib chiqmoqda. Bu haqda u «BBC Radio 4»dagi «World at One» dasturida, qisqartirishlar e’lon qilinishidan oldin ma’lum qilgan.

Masshtabli o‘zgarishlar to‘g‘risidagi qaror «Google»ning sobiq top-menejeri Met Brittin «BBC»ning yangi bosh direktori sifatida lavozimga kirishishi arafasida qabul qilindi. U 18-may kuni rasman lavozimni egallab, yaqinda ishdan ketgan Tim Devining o‘rnini egallaydi.

Talfan Devis, shuningdek, xodimlarni yollash, xizmat safarlari, konsalting xizmatlari, shuningdek, konferensiyalar, mukofot marosimlari va boshqa tadbirlarda ishtirok etish xarajatlari ustidan yanada qat’iy nazorat joriy etilishini ham e’lon qildi.

«Sekin-asta o‘lim»

«Bectu» eshittirish sohasi xodimlari kasaba uyushmasi rahbari Filippa Chaylds bu miqyosdagi qisqartirishlar ham xodimlar, ham «BBC» uchun vayronkor bo‘lishini ogohlantirdi. Uning aytishicha, korporatsiya xodimlari avvalgi qisqartirish to‘lqinlaridan keyin ham katta bosim ostida qolmoqda, yangi ishdan bo‘shatishlar esa «BBC»ning jamoatchilik oldidagi vazifalarini bajarish qobiliyatini muqarrar ravishda zaiflashtiradi.

«Feyk yangiliklar davrida va industriya bir necha transmilliy korporatsiyalar qo‘lida tobora jamlanib borayotgan sharoitda, Buyuk Britaniyaga har qachongidan ham ko‘proq kuchli, ambitsiyali va barqaror moliyalashtiriladigan «BBC» kerak», – dedi Filippa Chaylds.

U yana shuni qo‘shimcha qildiki, hukumat «Royal Charter renewal» yangilanganidan keyin «BBC» uchun ishonchli va uzoq muddatli moliyalashtirish modelini yaratishi kerak, aks holda milliy teleradiokompaniya «minglab qisqartirishlar orqali sekin-asta yo‘q bo‘lib ketish» xavfiga duch keladi.

«NUJ» Buyuk Britaniya jurnalistlari kasaba uyushmasining bosh kotibi Laura Devison esa yanada qattiqroq qisqartirish rejalarini «xato, zararli va xodimlar uchun noaniqlik hamda stress keltirib chiqaradigan qaror», deb baholadi.

Uning so‘zlariga ko‘ra, bu qisqartirishlar «BBC»ning asosiy vazifalarini – sifatli jurnalistika va axborot berish, o‘qitish va ko‘ngilochar dasturlar tayyorlash qobiliyatini jiddiy zaiflashtiradi.

«Bu davom etishi mumkin emas. «BBC» iste’dodli va tajribali xodimlarsiz sifatli jurnalistikani ta’minlay olmaydi», – dedi u.