Бойсундаги авария қачон тўлиқ бартараф этилади?
«Ўзбекнефтгаз» раҳбари Бойсундаги техноген аварияни бартараф этиш муддатини маълум қилди. Лойиҳада Хитой компанияси иштирок этади.
2024 йил сентябридан буён Сурхондарё вилоятининг Бойсун туманидаги «Мустақилликнинг 25 йиллиги» конида давом этаётган технологик авария 2027 йилнинг биринчи ярим йиллигида тўлиқ бартараф этилиши режалаштирилмоқда. Бу ҳақда «Ўзбекнефтгаз» бошқарув раиси Абдуғани Сангинов «Uzdiplomat» мухбирига берган интервюсида маълум қилди.
Унинг сўзларига кўра, президент томонидан Бойсундаги аварияни бартараф этиш бўйича бир неча бор топшириқ берилган ва муаммони ҳал қилиш учун хорижий компаниялар билан техник таҳлиллар ўтказилган. Натижада Хитойнинг «CNPC» корпорацияси таркибидаги «CCDC» компанияси билан шартнома имзоланган.
Нега Хитой танланди?
Абдуғани Сангиновнинг таъкидлашича, лойиҳа бўйича Россия, АҚШ ва Жанубий Корея компанияларининг таклифлари ҳам ўрганилган.
Таҳлиллар натижасида энг мақбул техник ечим ва таклиф Хитой компанияси томонидан тақдим этилгани учун айнан «CCDC» билан ҳамкорлик қилишга қарор қилинган.
Ҳозирда шартномани расмийлаштириш ишлари якунланмоқда. Компания мутахассислари Бойсун конига етиб келган ва амалий ишларга киришган.
Қудуқлар қазилади
«Ўзбекнефтгаз» раҳбарининг маълум қилишича, 2026 йил охирига қадар яна тўртта қўшимча қудуқни бурғулаш ишлари бошланади.
Унинг айтишича, аварияни тўлиқ бартараф этиш 2027 йилнинг биринчи ярим йиллигига мўлжалланган.
Айни пайтда лойиҳанинг умумий қиймати, Хитой компаниясига тўланадиган маблағ ҳамда техноген авария оқибатида етказилган зарар ҳажми ҳозирча очиқланмаган.
