Dubayda havo hujumi haqida ogohlantiruvchi sirenalar chalindi
Jebel-Ali hududida kuchli portlashlar eshitilgan. Birlashgan Arab Amirliklari Mudofaa vazirligi raketa hujumi qaytarilganini ma’lum qildi.
Dubay amirligining yirik sanoat va port hududi bo‘lgan Jebel-Alida kuchli portlash ovozlari eshitildi va havo trevogasi sirenalari chalindi. Birlashgan Arab Amirliklari Mudofaa vazirligi mazkur holatni mamlakatga yo‘naltirilgan raketa xavfini bartaraf etish doirasida havo hujumidan mudofaa tizimlarining ishlashi bilan izohladi.
«Dubayning Jebel-Ali hududida kuchli portlashlar eshitildi. BAA Mudofaa vazirligi Dubaydagi portlash ovozlari havo hujumidan mudofaa tizimlarining ishlashi natijasi ekanini ma’lum qildi», — deya xabar berdi «Tasnim News» agentligi o‘zining Telegram-kanalida.
Raketa xavfi va hukumatning rasmiy munosabati
BAA Mudofaa vazirligining X ijtimoiy tarmog‘idagi rasmiy bayonotida qayd etilishicha, havo hujumidan mudofaa tizimlari davlatga yo‘naltirilgan to‘g‘ridan-to‘g‘ri raketa xavfini aniqlagan.
Harbiy idora fuqarolar eshitishi mumkin bo‘lgan barcha ovozlar faqatgina mudofaa tizimlarining tezkor reaksiyasi va xavfni havoda ushlab qolishi natijasi ekanini ta’kidladi.
Arab ommaviy axborot vositalarining dastlabki xabarlariga ko‘ra, BAA tomon raketalar taxminan Yamandagi husiychilar tomonidan uchirilgan bo‘lishi mumkinligi aytilmoqda.
Bundan tashqari, aholining mobil qurilmalariga yuborilgan favqulodda xabarnomada Ichki ishlar vazirligi (MOI) yuzaga kelgan ehtimoliy raketa xavfi tufayli fuqarolardan zudlik bilan eng yaqin xavfsiz binodan boshpana topishni, derazalar, eshiklar va ochiq maydonlardan uzoqroq turishni hamda hukumatning keyingi ko‘rsatmalarini kutishni so‘ragan.
Eslatib o‘tamiz, joriy yilning iyul oyida ham Dubayning markaziy hududlaridan biri bo‘lgan Dauntaun aholisidan portlashlar haqida xabarlar kelib tushgan, biroq o‘shanda mahalliy politsiya bu ma’lumotlarni rad etgan edi. Bu safargi holatda esa rasmiy ravishda sirenalar chalinib, xavf tasdiqlandi.
