Дунёдаги энг катта юк самолёти Тошкентга қўнди
Украинанинг авиакомпаниясига тегишли дунёдаги энг йирик юк самолёти — An-124 «Руслан» Урумчидан парвоз қилиб, Тошкент аэропортига қўнди.
8 декабр куни Тошкент халқаро аэропорти дунёда серияли ишлаб чиқарилган энг катта юк самолёти — Украинанинг «Antonov Airlines» авиакомпаниясига тегишли An-124-100М «Руслан» самолётини қабул қилди.
Самолёт парвозни Хитойнинг Урумчи аэропортидан амалга оширди. «Uzbekistan Spotters Team» аъзолари улкан ҳаво кемасини Тошкентда фотосуратга олиб, ижтимоий тармоқларда эълон қилди.
An-124 — «Антонов» конструкторлик бюроси томонидан ишлаб чиқилган бўлиб, унинг биринчи парвози 1982 йил Киевда амалга оширилган. Самолёт узунлиги 69 метр, қанот кенглиги 73 метрни ташкил қилади. У 120 тоннагача юк кўтара олади, 865 km/h гача тезликда учиши мумкин. Ҳозиргача 56 бундай улкан учоқдан 56 таси ишлаб чиқарилган.
Самолёт бортига «Be brave like Kharkiv» («Харкив каби жасур бўл») деган ёзув туширилган бўлиб, у Украинадаги Харкив шаҳрининг урушда кўрсатган матонатига ишора қилади.
Ан-124 «Руслан» 2022 йилнинг баҳоридан бошлаб, яна дунёдаги энг катта юк ташувчи самолётга айланди. Чунки саҳнига 250 тонна юк ололадиган ва жаҳонда ягона бўлган Ан-225 «Мрия» самолёти Россиянинг Украинага босқини туфайли Киевдаги «Ҳостомел» аэропортида ёниб кетди.
«Руслан» катта ҳажмли ва оғир юкларни ташишда ҳозир дунё авиациясида ўзига хос ўринга эга. Унинг 1050 м³ ли кенг юк кабинаси ва олд-қуйруқ қисмидаги икки томонлама юклаш тизими самолётни халқаро логистикада талабгир қилади.
