Дунёнинг энг кекса президенти саккизинчи муддатга қайта сайланди

Камерунда бўлиб ўтган президентлик сайловларида 92 ёшли Пол Бийя саккизинчи марта президент этиб қайта сайланди. Бу ҳақда BBC хабар берди.

Пол Бийя сайловларда 53,66 фоиз овоз тўплаб, саккизинчи муддатга сайланди. У яна етти йил давомида Камерунни бошқаришни давом эттиради.

Пол Бийя 1982 йилдан буён мамлакат президенти лавозимини эгаллаб келаётган дунёдаги энг кекса амалдор раҳбар ҳисобланади.

Камерундаги сайловлар 12 октябрь куни ўтказилган, аммо расмий натижалар 27 октябрда эълон қилинди. Конституциявий судга натижаларни тасдиқлаш учун 15 кун вақт берилган эди. Марказий сайлов комиссияси овоз бериш тинч муҳитда ўтганини маълум қилди.

Маълумотларга кўра, Бийя сайловолди кампанияси давомида фақат бир марта митинг ўтказган, қолган вақтнинг катта қисмини шахсий ташриф билан Европада ўтказган. Сайловда жами ўн нафар номзод иштирок этди, уларнинг иккитаси Бийя тарафдорлари бўлиб, иштирок этиш учун вазирлик лавозимларини тарк этган.

Асосий рақиб сифатида кўрилган 71 ёшли мухолифат етакчиси Морис Камто эса июль ойида сайловда иштирок этишдан четлатилган. Конституциявий суд бу қарорни қўллаб-қувватлаган, аммо жамиятда бу ҳолат «сиёсий рақибни майдондан чиқариш учун қўлланган чора» сифатида баҳоланган.

Мухолифатнинг бошқа номзоди, собиқ вазир Иссе Чирома Бакари сайлов натижалари эълон қилинишидан олдин ўзини ғолиб деб эълон қилган эди. Бироқ расмий маълумотларга кўра, у 35,2 фоиз овоз тўплаган. Чирома ва унинг тарафдорлари ҳукуматни сайлов натижаларини сохталаштиришда айбламоқда.

Пол Бийя Камерундаги узоқ муддатли ҳукмронлиги билан Африкадаги энг тажрибали ва баҳсли сиёсий шахслардан бири сифатида баҳоланади. Унинг навбатдаги ғалабаси мамлакатдаги сиёсий барқарорлик ва демократия даражаси ҳақида янги баҳсларни келтириб чиқарди.