«Ford» kompaniyasining foydasi xomashyo narxlari oshishiga qaramay ko‘paydi

Aksiya boshiga to‘g‘rilangan foyda 49 sentni tashkil etdi va LSEG tahlilchilarining 40 sentlik prognozidan oshdi. «Ford» yillik foizlar va soliqlar to‘lanishidan oldingi foyda EBIT prognozining quyi chegarasini 500 mln dollarga oshirib, 10,5 mlrd dollarga yetkazdi.

Detroyt shahrida 28-oktabr kuni «Reuters» «Ford Motors» kompaniyasining uchinchi chorakdagi asosiy foydasi biroz oshib, 2,7 mlrd dollarga yetdi.

Michigan shtatida joylashgan avtomobil ishlab chiqaruvchi kompaniya eng ko‘p sotiladigan F-150 yuk mashinalarini ishlab chiqarishdagi muammolar va xomashyo xarajatlari oshishiga qaramay, bunday natijaga erishdi.

Kompaniya 28-oktabr kuni bir qator omillar, jumladan, Yaqin Sharqdagi mojaro, mis va po‘lat narxlarining oshishi, yoqilg‘i xarajatlarining ko‘payishi hamda chiplar qimmatlashishi sababli xarajatlar ortib borayotganini ma’lum qildi. «Ford» xomashyo xarajatlari bo‘yicha yillik prognozini taxminan 2 mlrd dollardan qariyb 2,5 mlrd dollarga oshirdi.

«Ford» yillik moliyaviy prognozining quyi qismini 500 mln dollarga oshirib, 10,5 mlrd dollarga yetkazdi. Foizlar va soliqlar to‘lanishidan oldingi foyda bo‘yicha yuqori chegara esa 11 mlrd dollar darajasida qoldi. Savdolar yakunlanganidan keyin Ford aksiyalari taxminan 1,5 foizga pasaydi.

«General Motors» aksiyalari ham o‘tgan hafta kompaniya uchinchi chorakda yuqori foyda ko‘rsatganiga qaramay, xomashyo xarajatlarining oshishi moliyaviy holatga bosim o‘tkazganidan so‘ng keskin pasaydi.

O‘tgan oyda yetkazib beruvchi bilan bog‘liq noma’lum muammo tufayli «Ford» kompaniyasining F-150 yuk mashinalarini ishlab chiqarish qariyb bir haftaga to‘xtab qoldi. Kompaniya bundan avval ham o‘tgan yili Nyu-Yorkdagi alyuminiy yetkazib beruvchi muhim hamkori «Novelis» zavodida sodir bo‘lgan yong‘in tufayli ushbu pikaplar ishlab chiqarishida yuzaga kelgan katta yo‘qotishlarni qoplashga harakat qilayotgan edi.

«Ford» moliyaviy direktori Sherri Xaus 28-oktabr kuni jurnalistlarga «Novelis» kompaniyasining ishlab chiqarish faoliyatini tiklash jarayoni yakunlanganini aytdi.

«Ford» bosh direktori Jim Farleyning tahlilchilarga ma’lum qilishicha, kompaniya F-150 pikaplarini odatdagidan ancha yuqori sur’atda ishlab chiqarmoqda. «Ford» avtomobillar zaxirasini odatdagi 80–100 kunlik daraja o‘rniga 55–60 kunlik darajada saqlashni maqsad qilgan.

«Bu bizga to‘liq o‘lchamli pikaplar biznesini intizomli tarzda yo‘lga qo‘yish imkonini berdi. Bu vaqtda raqobatchilarimiz butunlay boshqacha yo‘l tutmoqda», — dedi Farley.

Kompaniyaning daromadi 49,5 mlrd dollarga, sof foydasi esa 2 mlrd dollarga yetdi. Xausning aytishicha, «Ford» 2027-yildagi asosiy foydasi 2026-yildagi ko‘rsatkichga taxminan teng bo‘lishini kutmoqda.

Savdo kelishuviga erishish zarurati ortib bormoqda

«RBC Capital Markets» tahlilchisi Tom Narayanning aytishicha, talab barqaror bo‘lgani sababli avtomobil ishlab chiqaruvchilar narxlarni belgilashda katta imkoniyatlarga ega. «Ford» esa joriy yilda avtomobillar narxi o‘rtacha 1 foizga oshishini kutmoqda.

Narayan, shuningdek, «Ford» va «General Motors» yil oxirigacha AQSH va Meksika o‘rtasida ikki tomonlama savdo kelishuviga erishilishidan ayniqsa katta foyda ko‘rishini ta’kidladi. Bu ikki kompaniyaning Shimoliy Amerikadagi o‘zaro bog‘langan ishlab chiqarish tizimiga qaramligi bilan izohlanadi.

«Ford» Amerikaga qo‘shni mamlakatlarda muhim butlovchi qismlarni ishlab chiqaradi va u yerlarda avtomobillarni yig‘adi. Jumladan, «Bronco Sport» va «Maverick» modellari Meksikada, «Super Duty» pikaplari esa Kanadada ishlab chiqariladi.

27-oktabr kuni «Reuters» tadbirida so‘zga chiqqan «Honda» rahbarlaridan biri 1-yanvardan boshlab Kanadadan keltiriladigan po‘lat va avtomobillarga AQSH bojlarining oshirilishi sanoat uchun halokatli bo‘lishini ogohlantirdi. Hozirda bu bojlar 25 foizni tashkil etadi va kelasi yil boshida ikki baravarga oshirilishi rejalashtirilgan.

«Reuters» agentligi shu hafta ikki davlat hukumatlari avgust oyida savdo muzokaralari to‘xtab qolganidan so‘ng Kanada po‘lati va avtomobillariga nisbatan AQSH bojlarini pasaytirish bo‘yicha kelishuv ustida ishlayotganini xabar qildi.

Farley AQSH, Meksika va Kanadani qamrab olgan kengroq savdo kelishuvi — USMCA bo‘yicha tezroq kelishuvga erishishga chaqirdi. Uning fikricha, bu AQSH avtomobil ishlab chiqaruvchilariga Yaponiya va Janubiy Koreya kompaniyalari bilan raqobatlashish imkonini beradi. Ushbu mamlakatlar avtomobillariga Vashington bilan tuzilgan savdo kelishuvlari doirasida AQSHda 15 foizlik boj qo‘llaniladi.

«Ford» kompaniyasining AQSHdagi avtomobillar savdosi joriy yilning uchinchi choragi yakuniga qadar yil boshidan beri 8,6 foizga kamaydi. Bunga kompaniyaning «Escape» yo‘l tanlamas avtomobilini ishlab chiqarishni to‘xtatish, shuningdek, elektromobil va gibrid avtomobillar savdosining pasayishi ta’sir ko‘rsatdi.