Ипотека кредити миқдори оширилди
2026 йилда ипотека дастурига 23 трлн сўм ажратилиб, 73 мингдан ортиқ оила уй-жой билан таъминланиши режалаштирилмоқда.
Президентнинг 16 февралдаги қарорига мувофиқ, 2026 йилда ипотека дастурларини молиялаштириш учун жами 23 трлн сўм йўналтирилади. Шу билан бирга, ипотека кредитларининг энг юқори миқдори оширилиб, Тошкент шаҳрида 480 млн сўм, ҳудудларда эса 380 млн сўм этиб белгиланди.
Маблағни молиялаштирувчи манбалар
Молиялаштириш манбаларига кўра, 12,2 трлн сўм давлат бюджети ҳисобидан, 7,8 трлн сўм тижорат банклари маблағлари орқали, яна 3 трлн сўм «Ўзбекистон ипотекани қайта молиялаштириш компанияси» АЖ маблағлари ҳисобига ажратилади. Бу ҳажм ипотека бозорида ликвидликни таъминлаш ва аҳоли талабини қондиришга қаратилган.
Шунингдек, ипотека кредитларини субсидиялаш учун қўшимча 2,7 трлн сўм ажратиш кўзда тутилган. Мазкур маблағлар орқали фуқароларнинг бошланғич бадал ҳамда фоиз тўловларининг бир қисми қоплаб берилади.
Неча нафар фуқаро субсидия билан таъминланади
Расмий маълумотларга кўра, ажратилган ресурслар ҳисобидан 73 мингдан ортиқ оила уй-жой билан таъминланиши кутилмоқда. Қарийб 30 минг нафар фуқаро ипотека кредитлари бўйича субсидия олиш имкониятига эга бўлади.
Ушбу чоралар уй-жой бозорида талабни рағбатлантириш, қурилиш соҳасида фаолликни ошириш ҳамда аҳолининг уй-жой шароитини яхшилашга хизмат қилиши кутилмоқда.
Эслатиб ўтамиз, 2026 йилда Ўзбекистонда битта квартира учун ажратиладиган имтиёзли ипотека кредити миқдори 15 фоизга оширилиши ҳақида президент Шавкат Мирзиёев Олий Мажлис ва Ўзбекистон халқига мурожаатномасида маълум қилган эди.
