Исроил Эрон қўмондони Алиризо Тангсирийни йўқ қилди — ОАВ
Исроил армияси Ҳўрмуз бўғози яқинида ИИСК ҲДҚ қўмондони Алиризо Тангсирийни ҳаво зарбаси билан ҳалок қилди. У бўғозни ёпиш режаларига масъул эди.
Исроил мудофаа кучлари пайшанба куни эрталаб Ҳўрмуз бўғози яқинидаги Бандар-Аббос шаҳрида Ислом инқилоби муҳофизлари корпуси (ИИМК) Ҳарбий-денгиз кучлари қўмондони Алиризо Тангсирийни йўқ қилгани иддао қилинмоқда. Исроил расмийларининг «The Jerusalem Post» нашрига тасдиқлашича, маҳаллий вақт билан соат 03:00 да содир этилган ҳаво ҳужуми натижасида Тангсирий билан бирга унинг бир неча юқори мартабали ёрдамчилари ҳам ҳалок бўлган.
Алиризо Тангсирий Эроннинг Ҳўрмуз бўғозини ёпиб қўйиш ва минтақадаги кемалар қатновини назорат қилиш бўйича асосий стратеги ҳисобланар эди. Исроил мудофаа вазирлигидаги манбалар ушбу операция Теҳроннинг денгиз қароқчилиги ва энергетик шантаж сиёсатига берилган кескин жавоб эканини таъкидламоқда.
Ушбу суиқасд минтақадаги ҳарбий кескинликни энг юқори нуқтага олиб чиқиши кутилмоқда. «The Times of Israel» нашрининг қайд этишича, Тангсирийнинг ўлими Эроннинг денгиз операцияларини бошқариш тизимига жиддий зарба бўлди.
Теҳрон ҳозирча ушбу йўқотиш бўйича расмий баёнот бермаган бўлса-да, Исроилнинг давлат телерадиокомпанияси «Kan» ҳужум ҳақидаги маълумотларни тасдиқлади. Эндиликда Эроннинг Ҳўрмуз бўғозидаги кейинги ҳаракатлари номаълумлигича қолмоқда.
Энергетик қамал ва нефт инқирози
Ҳўрмуз бўғози орқали уруш бошланишидан аввал кунига қарийб 15 млн баррелни ташкил этган нефт хомашёси ва 5 млн баррел нефт маҳсулотлари ташилган. Бироқ жорий ҳафта бошига келиб, ушбу таъминот ҳажми 16 млн баррелга қисқариб кетган. Тангсирий айнан шу таъминот занжирини узиш ва бўғозни тўлиқ ёпиб қўйиш режаларини ишлаб чиққан эди.
Бозор таҳлилчилари қўмондоннинг йўқ қилиниши нефт нархининг янада кўтарилишига сабаб бўлишидан хавотирда. Эроннинг эҳтимолий қасос ҳужумлари Форс кўрфазидаги танкерлар ҳаракатини бутунлай тўхтатиб қўйиши мумкин. Бу эса глобал энергетика хавфсизлигини жиддий хавф остида қолдиради ва жаҳон иқтисодиёти учун кутилмаган зарба бўлади.
Геосиёсий портлаш эҳтимоли
Исроилнинг ушбу амалиёти Эроннинг ҳарбий салоҳиятини заифлаштиришга қаратилган бўлса-да, бу Теҳронни янада қаттиқроқ чоралар кўришга ундаши мумкин. Тангсирий нафақат қўмондон, балки ИИМК ичидаги энг нуфузли шахслардан бири эди. Унинг ўлими Исроил ва Эрон ўртасидаги бевосита урушнинг янги босқичи бошланганини англатади.
Айни пайтда АҚШ ва унинг иттифоқчилари Форс кўрфазидаги кема қатновини ҳимоя қилиш учун қўшимча кучларни сафарбар этмоқда. Агар бўғоз бутунлай ёпилса, бу нафақат минтақавий, балки глобал молиявий тизимнинг қулашига олиб келиши мумкин.
