Исроилда жанжал бошланди: Италия яҳудий элчисини чақиртирмоқда

Исроил Миллий хавфсизлик вазири Итамар Бен-Гвир ва транспорт вазири Мири Регев ЦАХАЛ Ҳарбий-денгиз кучлари томонидан қўлга олинган «Сумуд» флотилиясининг хорижлик фаоллари сақланаётган Ашдод портидаги ёпиқ объектга борди. Бу ҳақда Исроил ОАВлари хабар берди.

Вазирлар расмий каналлар орқали тарқатган видеоларда қўли боғланган, тиз чўктирилган ва боши эгилган хорижлик фаоллар акс этган. Кадрларда Итамар Бен-Гвир асир олинганлар орасида Исроил байроғини кўтарган ҳолда тургани кўринади.

У «Исроилга қарши чиққан ҳар ким давлатнинг қатъий жавобини олади» дея баёнот берган.

Кадрларнинг бирида фаол аёллардан бири «Фаластинга озодлик!» дея ҳайқиргани, шундан сўнг қамоқхона ходимлари унга нисбатан куч ишлатиб, ерга босиб ётқизгани акс этган.

Бен-Гвир бош вазир Бинямин Нетаньяҳудан қўлга олинганларни узоқ муддат ҳибсда сақлаш ва ҳатто «террорчилар қамоқхоналари»га ўтказиш имкониятини кўриб чиқишни сўраган.

Ҳукумат ичида можаро

Исроил ташқи ишлар вазири Гидеон Саар Бен-Гвирнинг ҳаракатларини кескин танқид қилди.

Унинг айтишича, мазкур видео мамлакатнинг халқаро имижига жиддий зарар етказган. Саар Бен-Гвирга қарата «сиз бу шармандали шоуни уюштириб, давлатга онгли равишда зарар етказдингиз ва бу биринчи марта эмас», дея баёнот берган.

Бен-Гвир эса бунга жавобан ҳукуматда ҳали ҳам «террор тарафдорлари билан қандай муносабатда бўлишни тушунмайдиганлар бор»лигини айтган.

Италия жавоб талаб қилди

Италия бош вазири Жоржа Мелони ушбу тасвирларга муносабат билдириб, Бен-Гвирнинг хатти-ҳаракатини «қабул қилиб бўлмас» деб атади.

«Ичида кўплаб Италия фуқаролари бўлган бу намойишчиларга нисбатан инсон қадр-қимматини таҳқирлайдиган бундай муносабатда бўлинишига асло йўл қўйиб бўлмайди», — дея таъкидлади у.

Италия ҳукумати раҳбари, шунингдек, юз берган ҳолат юзасидан расмий тушунтириш бериши учун Исроил элчиси ТИВга чақиртирилишини маълум қилди.

Италия ташқи ишлар вазири Антонио Таяни ҳам содир бўлаётган воқеаларни «ёввойиларча муносабат» деб атаб, расмий Тел-Авивдан изоҳ ва узр талаб қилди.