Jahon banki O‘zbekistonda gaz sizib chiqishini kamaytirish uchun grant ajratdi

Jahon banki O‘zbekistonda tabiiy gaz uzatish tizimidagi yo‘qotishlarni kamaytirishga qaratilgan loyihani moliyalashtirish uchun 10,6 million dollar miqdorida grant ajratishni ma’qulladi. Mablag‘lar mamlakatdagi eskirgan gaz infratuzilmasida yuzaga kelayotgan sizib chiqish holatlarini aniqlash va bartaraf etishga yo‘naltiriladi.

Loyiha doirasida «O‘ztransgaz» kompaniyasi tomonidan boshqariladigan gaz uzatish tarmoqlarida sizib chiqishlarni aniqlash va ularni bartaraf etish mexanizmlarini joriy etish rejalashtirilgan. Bu choralar uy xo‘jaliklari hamda sanoat korxonalarini tabiiy gaz bilan barqaror ta’minlashga xizmat qiladi.

Tashabbus Jahon bankining «Global Flaring and Methane Reduction» (GFMR) trast jamg‘armasi mablag‘lari hisobidan moliyalashtiriladi. Ushbu dastur neft va gaz sohasida metan chiqindilarini kamaytirish hamda yo‘ldosh gazni yoqishni qisqartirishga qaratilgan xalqaro tashabbus hisoblanadi.

Qancha gaz tejaladi

Loyihaga ko‘ra, 2029 yilgacha ta’mirlash va texnik chora-tadbirlar orqali taxminan 47,5 ming tonna tabiiy gaz sizib chiqishining oldini olish rejalashtirilgan. Bu nafaqat resurslarni tejash, balki atmosferaga chiqadigan metan miqdorini ham kamaytirishga xizmat qiladi.

Mutaxassislar hisob-kitoblariga ko‘ra, gaz yo‘qotishlarining kamayishi taxminan 18 million dollar miqdorida iqtisodiy samara beradi. Ushbu mablag‘larning asosiy qismi kelgusida gaz tarmoqlarida sizib chiqishlarni aniqlash va bartaraf etish bo‘yicha uzoq muddatli chora-tadbirlarni amalga oshirishga yo‘naltiriladi.

Loyiha doirasida «O‘ztransgaz» uchun zamonaviy aniqlash uskunalarini xarid qilish, mutaxassislarni tayyorlash va metan emissiyasini hisobga olish hamda hisobot yuritishning xalqaro standartlarini joriy etish ham ko‘zda tutilgan.