Катта қурилиш майдонларида мониторинг станциялари ўрнатилади
Президент фармони билан мониторинг станцияларини Экология қўмитаси тизимига улаш қурилишни давом эттиришнинг асосий шарти этиб белгиланди.
Президентнинг «Тошкент шаҳрида экологик вазиятни яхшилаш бўйича кечиктириб бўлмайдиган чора-тадбирлар тўғрисида»ги фармони билан Тошкентда қурилиш майдонлари назорати кучайтирилади.
Фармонга кўра, бир ҳафта ичида 500 метр квадрат ва ундан катта майдонларда комплекс текширувлар ўтказилиб, майдонларнинг камида 25 фоизи кўкаламзорлаштирилгани, сув пуркагичлар ўрнатилгани, кириш-чиқиш йўлларида автотранспорт ғилдираклари ювиладиган ҳавзалар мавжудлиги ва материаллар брезент ёки ПВХ қоплама билан ёпилган ҳолда ташилаётгани текширилади.
Шунингдек, чанг ва қумнинг ҳавога кўтарилишига йўл қўймаслик талаблари қатъий назоратга олинади.
Фармонга мувофиқ, катта қурилиш майдонларида мониторинг станциялари мажбурий ўрнатилади. Жумладан, майдони 1 000 метр квадратдан ортиқ объектларда мониторинг ускуналарини ўрнатиш ва Экология қўмитаси тизимига улаш қурилишни давом эттиришнинг асосий шарти этиб белгиланди.
