Korzinka бош директори лавозимига Педро Мартиню тайинланди

Korzinka (Anglesey Food МЧЖ) нинг бошқарув органлари томонидан ўтказилган халқаро қидирув якунларига кўра, компаниянинг янги бош директори этиб Педро Мартиню тайинланди. У Тошкентга кўчиб келган ва 2-сентябрдан ишга киришган.

Компания матбуот хизмати хабарига кўра, янги раҳбар озиқ-овқат чакана савдоси соҳасида 30 йилдан ортиқ тажрибага эга. У Полша, Португалия, Болтиқбўйи мамлакатлари ва Озарбойжондаги йирик чакана савдо компанияларида турли раҳбарлик лавозимларида ишлаган.

Педро Мартиню ким?

Педро Мартиню 2003-йилда Полшанинг «Eurocash Group» компанияси бошқарув кенгашига қўшилган. У компанияда 20 йилдан ортиқ вақт давомида турли раҳбарлик лавозимларида фаолият юритган.

Мартинюнинг Eurocash’даги сўнгги лавозими Полшанинг озиқ-овқат маҳсулотларини онлайн сотишга ихтисослашган «Frisco.pl» компанияси бош директори эди.

Korzinka кузатув кенгаши раиси Зафар Ҳошимовнинг айтишича, Мартиню иқтисодиёти жадал ривожланаётган мамлакатларда чакана савдо компанияларини ривожлантириш ва бизнесини кенгайтириш бўйича катта тажрибага эга. Унинг фикрича, ушбу тажриба Korzinka ривожида муҳим аҳамият касб этади.

Korzinka’нинг аввалги раҳбари ким эди?

Компаниянинг аввалги бош директори Руд Педерсен 2025-йилнинг сентябрида оилавий сабабларга кўра лавозимини тарк этган. Шундан сўнг компания бош директори вазифасини вақтинча унинг биринчи ўринбосари Акмал Асадов бажариб келган.

Эслатиб ўтамиз, аввалроқ Korzinka асосчиси Зафар Ҳошимов компания нега Хоразм ва Қорақалпоғистонда филиал очмагани ҳақида айтганди.