Korzinka, Uzum ва Artel: Ўзбекистонда жамоат аҳамиятига эга компаниялар рўйхати эълон қилинди

Иқтисодиёт ва молия вазирлиги Жамоат аҳамиятига эга ташкилотлар (Public Interest Entities — PIE) ҳуқуқий мақоми ҳамда уларнинг мезонлари ва реестрини эълон қилди.

Рўйхатдан умумий 425 та ташкилот ва компания ўрин олди. Уларнинг ярмидан кўпи — 226 таси банк ва тўлов ташкилотлари ҳисобланади.

Бундан ташқари, 14 та инвестиция фондлари ва биржалари, 44 та давлат корхоналари, 96 та листингга кирган ташкилотлар ва 132 та йирик корхоналар мавжуд.

Жамоат аҳамиятига эга ташкилотлар тоифасига кириш мезонлари талабларига жавоб берадиган ташкилотлар (компаниялар) реестри махсус ваколатли орган — Иқтисодиёт ва молия вазирлиги томонидан Марказий банк билан биргаликда шакллантирилган.

Рўйхатдаги ташкилот ва компаниялар 2027 йил 1 январдан бошлаб Молиявий ҳисоботнинг халқаро стандарти (МҲХС) асосида бухгалтерия ҳисоби юритилишини ташкил этади.

Бунда улар томонидан 2028 йил якунига кўра молиявий ҳисоботларни МҲХСга мувофиқ тузиш ва уларни аудиторлик хулосалари билан бирга эълон қилиш жараёни амалга оширилиши керак.

Қонунчилик ҳужжатларида МҲХСга ўтишнинг эртароқ муддатлари назарда тутилган компаниялар бундан мустасно ҳисобланади.

Иқтисодиёт ва молия вазирлигининг ёзишича, Жамоат аҳамиятига эга ташкилотларнинг ҳуқуқий мақоми ҳамда ушбу тоифага кириш мезонлари ва ташкилотлар реестрининг шакллантирилиши Ўзбекистонда молиявий ҳисобот ва аудит тизимининг шаффофлиги ҳамда сифатини оширишга хизмат қилади.

Рўйхатда қандай компаниялар бор?

Эълон қилинган реестрдан барча 34 та банк жой олган. Шунингдек, Click ва Paynet каби тўлов ташкилотлари ҳам унга киритилган.

Солиқ қўмитаси маълумотлари бўйича Ўзбекистонда чеклари энг кўп рўйхатдан ўтказиладиган «Korzinka» дўконлар тармоғи — «Angelesey Food» МЧЖ ҳам рўйхатда мавжуд.

Бироқ чеклар сони бўйича иккинчи ўринда турадиган «Havas» дўконлар тармоғи (Havas Food) реестрдан жой олмаган. Аксинча, «Makro» дўконлари компанияси «Darvoza Savdo» МЧЖ реестрга киритилган.

Uzum экотизимига кирувчи деярли барча компаниялар — Uzum Bank, Uzum Market, Uzum Sarmoya, шунингдек, Tezcoin ва Shaffof-moliya микромолия ташкилотлари 425 талик рўйхатдан жой олган.

Бундан ташқари, Ўзбекистондаги йирик маиший техника ва электроника ишлаб чиқарувчиси «Artel Electronics» МЧЖ, «Texnomart» МЧЖ дўконлар тармоғи, Beeline, Ucell ва Mobiuz алоқа операторлари ҳам реестрга қўшилган.

Реестрдаги аксарият компаниялар шундоқ ҳам молиявий ҳисоботларини доимий очиқ эълон қилиб келади. Бироқ «Korzinka» ва «Artel» каби компаниялар эндиликда ҳисоботларини доимий очиқлаши керак бўлади.