Мексикада самолёт қулаб тушиши оқибатида камида 7 киши ҳалок бўлди
Фавқулодда қўниш пайтида содир бўлган авиаҳалокат йирик ёнғинга сабаб бўлиб, ҳудуд аҳолиси эвакуация қилинди.
Мексиканинг марказий қисмида хусусий кичик самолётнинг ҳалокатга учраши оқибатида камида етти нафар инсон ҳалок бўлди. Расмийларга кўра, самолёт фавқулодда қўнишга уринаётган вақтда назоратни йўқотиб, саноат ҳудудига қулаб тушган.
Ҳодиса Мехико шаҳридан тахминан 50 километр ғарбда жойлашган Толука шаҳри яқинидаги Сан-Матео-Атенко туманида рўй берган. Мексика штати Фуқаролик муҳофазаси координатори Адриан Эрнандеснинг маълум қилишича, самолёт Акапулкодан учиб чиққан ва Толука аэропортидан бир неча километр масофада ҳалокатга учраган.
Расмий маълумотларга кўра, хусусий самолётда саккиз нафар йўловчи ва икки нафар экипаж аъзоси бўлган. Бироқ ҳалокатдан бир неча соат ўтиб, фақат етти нафар қурбоннинг жасади топилган. Қидирув-қутқарув ишлари давом этмоқда.
Эрнандеснинг айтишича, самолёт маҳаллий футбол майдонига қўнишга ҳаракат қилган, аммо яқин атрофда жойлашган корхонанинг металл том қисмига урилиб кетган. Зарба оқибатида катта ёнғин чиққан ва ёнғин тез орада атрофдаги биноларга тарқалиш хавфини келтириб чиқарган.
Сан-Матео-Атенко шаҳри мэри Ана Мунис Миленио телеканалига берган интервьюсида ёнғин сабаб 130 нафарга яқин аҳоли хавфсиз ҳудудга эвакуация қилинганини маълум қилди. Унинг таъкидлашича, ҳодиса жойида ўт ўчириш ва тезкор хизматлар иш олиб борган.
Айни пайтда авиаҳалокат сабаблари ўрганилмоқда. Тергов доирасида техник носозлик ёки бошқа омиллар эҳтимоли кўриб чиқилмоқда.
