O‘g‘irlangan 2 trln so‘m, ogohlantirilgan monopolistlar va IPO orqali sotiladigan aviakompaniya — 15-iyun dayjesti

2026-yil oxirigacha «Uzbekistan Airways»ning 15-20 foiz aksiyasi IPO orqali sotiladi

Prezident Shavkat Mirziyoyev «Uzbekistan Airways»ni transformatsiya qilish va IPOga tayyorlash ishlari bilan tanishdi. Rejaga ko‘ra, 2026 yil yakuniga qadar milliy aviakompaniya aksiyalarining 15–20 foizi xalqaro IPO orqali sotiladi. Kompaniya uchun ishlab chiqilgan 115 ta transformatsiya chorasi to‘liq amalga oshirilsa, yillik operatsion daromadlarni 120 mln dollarga oshirish va bozor qiymatini 1,6 mlrd dollardan 2,3 mlrd dollargacha yetkazish mumkinligi qayd etilgan.

Transformatsiya dasturi marshrutlarni optimallashtirish, to‘g‘ridan-to‘g‘ri sotuvlarni ko‘paytirish, reyslar kechikishi va bekor qilinishini kamaytirish hamda texnik xizmatlar samaradorligini oshirishni nazarda tutadi. Shu bilan birga, turistlar oqimi tez o‘sib borayotgan bir paytda samolyotlar parkini kengaytirish ishlarini jadallashtirish vazifasi qo‘yildi. Hukumat Toshkentni Markaziy Osiyoning yirik aviaxabiga aylantirish maqsadida «Uzbekistan Airways», «Uzbekistan Airports» va Yangi Toshkent aeroporti o‘rtasidagi hamkorlikni kuchaytirishni rejalashtirmoqda.

May oyida Toshkentda jamoat transportidan foydalanuvchilar soni qisqardi

Toshkent shahrida jamoat transportidan foydalanish ko‘rsatkichlari pasaymoqda. ATTO ma’lumotlariga ko‘ra, 2026 yil may oyida avtobuslarda 33,3 million tranzaksiya qayd etilgan bo‘lib, bu o‘tgan yilning shu davriga nisbatan 9 foizga kam. Metropolitenda ham pasayish kuzatilib, to‘lovlar soni 16,8 millionni tashkil qildi va yillik hisobda 3 foizga qisqardi. Bu holat poytaxt aholisining jamoat transportidan foydalanish faolligi susayganini ko‘rsatmoqda.

Shu bilan birga, respublika bo‘yicha umumiy dinamika ijobiy bo‘lib qolmoqda. May oyida ATTO tizimi orqali 67,4 million tranzaksiya amalga oshirilib, o‘tgan yilga nisbatan 10 foiz o‘sish qayd etildi. Ayniqsa Samarqand, Farg‘ona, Namangan, Qarshi va Andijon shaharlarida jamoat transportidan foydalanish sezilarli oshgan. Bank kartalari orqali to‘lovlar ham 42 foizga ko‘payib, aholi raqamli to‘lov usullariga tobora faol o‘tayotganini namoyon qildi.

Raqobat qo‘mitasi monopol korxonalarni asossiz narx oshirmaslikka chaqirdi

Raqobat qo‘mitasi 1-iyundan yoqilg‘i-energetika resurslari narxlari 10 foizga oshirilganidan so‘ng monopol va tabiiy monopoliya korxonalarini mahsulot hamda xizmatlar narxlarini asossiz ravishda oshirmaslikka chaqirdi. Qo‘mita ma’lum qilishicha, energiya resurslari qimmatlashishi ayrim sohalar tannarxiga ta’sir qilishi mumkin, ammo bu holat narxlarni iqtisodiy jihatdan asoslanmagan tarzda oshirish uchun sabab bo‘la olmaydi.

Idora monopol korxonalar faoliyati va ular qo‘llayotgan narxlarni doimiy monitoring qilib borayotganini ta’kidladi. Qo‘mita yoqilg‘i-energetika resurslari ulushining mahsulot tannarxiga ta’sirini oldindan baholaganini hamda qonunchilik talablarini buzib, narxlarni sun’iy oshirgan korxonalarga nisbatan choralar ko‘rilganini ma’lum qildi. Shu bilan birga, har qanday asossiz narx oshirish holatlari aniqlansa, moliyaviy jarimalar va boshqa ta’sir choralari qo‘llanishi ogohlantirildi.

Germaniya prezidenti O‘zbekistonga tashrif buyuradi

Germaniya prezidenti Frank-Valter Shtaynmayyer Osiyo bo‘ylab rasmiy safari doirasida O‘zbekistonga tashrif buyuradi. Besh kunlik safar dasturiga Indoneziya, Filippin va O‘zbekiston kiritilgan bo‘lib, prezidentga turmush o‘rtog‘i hamda Germaniyaning turli sohalardagi kompaniyalari vakillaridan iborat biznes delegatsiyasi hamrohlik qiladi. Tashrif ikki davlat o‘rtasidagi iqtisodiy va investitsiyaviy hamkorlikni yanada mustahkamlashi kutilmoqda.

Toshkentda Germaniya rahbari GP Günter Papenburg kompaniyasi filiali faoliyati bilan tanishishi rejalashtirilgan. Shuningdek, muzokaralarning asosiy mavzularidan biri mehnat migratsiyasi bo‘ladi. Germaniyada malakali mutaxassislarga talab ortib borayotgani sababli mamlakat O‘zbekiston bilan kadrlar tayyorlash va mehnat bozori sohasidagi hamkorlikni kengaytirishga alohida e’tibor qaratmoqda.

Kiberjinoyatchilar 2 trln so‘mdan ortiq pulni talon-toroj qilgan — IIV

O‘zbekistonda kiberjinoyatlar ko‘lami keskin oshib, 2025 yilda qayd etilgan barcha jinoyatlarning qariyb yarmi — 49,6 foizi kiberjinoyatlar hissasiga to‘g‘ri kelgan. Bu haqda Senat majlisida Mirzoxon Zubaydullayev ma’lum qildi. Uning so‘zlariga ko‘ra, so‘nggi yillarda kiberjinoyat turlari 18 tadan 64 tagacha ko‘paygan bo‘lib, jinoyatlarning 96 foizi elektron to‘lov tizimlari orqali sodir etilmoqda. Jami zarar miqdori esa 2 trillion so‘mdan oshgan.

Kiberfiribgarlikka qarshi kurashish maqsadida Markaziy bank, Ichki ishlar vazirligi va Bosh prokuratura o‘rtasida maxsus hamkorlik mexanizmi yo‘lga qo‘yilgan. Mutasaddilarning ma’lum qilishicha, yangi tizim orqali so‘nggi besh oyda 1,7 trillion so‘m mablag‘ning noqonuniy ravishda xorijga chiqarilishining oldi olingan va jinoyatlarga aloqador 10 ming 250 ta bank kartasi bloklangan. Shuningdek, 2026 yilda kiberjinoyatlarni fosh etish ko‘rsatkichlari 3,5 barobarga, ularni aniqlash samaradorligi esa 5 barobarga oshgan.