Oliy ta’lim vazirligi xodimi 100 ming dollar pora bilan qo‘lga tushdi
Vazirlik mutaxassisi universitet filiali uchun litsenziya masalasini tez hal qilish evaziga 100 ming AQSH dollari talab qilgani aytilmoqda.
Toshkent shahrida o‘tkazilgan tezkor tadbirda O‘zbekiston Respublikasi Oliy ta’lim, fan va innovatsiyalar vazirligining Ta’lim tashkilotlarini litsenziyalash bo‘limi yetakchi mutaxassisi 100 ming AQSH dollarini olgan vaqtida qo‘lga olindi. Bu haqda Davlat xavfsizlik xizmati ma’lum qildi.
Ma’lum qilinishicha, vazirlik xodimi Qarshi shahrida faoliyat yuritayotgan nodavlat oliy ta’lim muassasasining Surxondaryo viloyatida filial ochishi uchun litsenziya berish masalasini qisqa muddatda ijobiy hal qilib berishni va’da qilgan.
Shuning evaziga u mazkur universitetning mansabdor shaxsidan 100 ming AQSH dollari miqdorida pul talab qilgan. Pul mablag‘lari litsenziya olish jarayonini tezlashtirish uchun talab qilingani aytilmoqda.
Davlat xavfsizlik xizmatining Qashqadaryo viloyati bo‘yicha boshqarmasi xodimlari tomonidan Toshkent shahrida o‘tkazilgan maxsus tezkor tadbir davomida vazirlik xodimi so‘ralgan pul mablag‘ini olgan vaqtida ashyoviy dalillar bilan ushlangan.
Jinoyat ishi
Holat yuzasidan Davlat xavfsizlik xizmati Tergov boshqarmasi tomonidan jinoyat ishi qo‘zg‘atildi. Unga nisbatan Jinoyat kodeksining 168-moddasi, 4-qismi «a» bandi — firibgarlik moddasi bo‘yicha ayblov qo‘yildi.
Tergov organlari tomonidan gumonlanuvchiga nisbatan «qamoq» ehtiyot chorasi qo‘llandi. Ayni paytda ushbu holat bo‘yicha qo‘shimcha tergov harakatlari olib borilmoqda.
Davlat xavfsizlik xizmati fuqarolarni bunday qonunbuzilish holatlariga duch kelganda 1520 qisqa raqami orqali murojaat qilishga chaqirdi. Idoraga ko‘ra, murojaat qilgan shaxslarning shaxsiyati sir saqlanishi kafolatlanadi.
