Ўзбекистон «LUKOIL»га киритилган санкциялари юзасидан қандай иш олиб бораётгани айтилди
Энергетика вазиридан «LUKOIL»га киритилган санкциялар унинг Ўзбекистондаги лойиҳаларига қандай таъсир қилиши ва санкциялар Ўзбекистоннинг ёқилғи-энергетикасига ҳам таъсир қиладими ёки йўқлиги сўралди.
Ўзбекистон Россиянинг энг йирик нефт компанияларидан бири «LUKOIL»га нисбатан киритилган санкциялар масаласида АҚШ Молия вазирлигининг Ташқи активларни назорат қилиш бошқармаси (OFAC) билан ишлаяпти. Бу ҳақда мамлакат энергетика вазири Жўрабек Мирзамаҳмудов Олий Мажлиси Қонунчилик палатасининг навбатдаги мажлисида сўз очди.
Мажлисда депутат вазирга «LUKOIL»га киритилган санкциялар унинг Ўзбекистондаги лойиҳаларига қандай таъсир қилиши ва санкцияларнинг жорий этилиши Ўзбекистоннинг ёқилғи энергетика соҳасига ҳам таъсир қиладими ёки йўқлиги ҳақида сўради.
«Биз халқаро нормаларга, санкция режимига тўлиқ риоя қилган ҳолда [«LUKOIL»га нисбатан жорий қилинган санкциялар масаласида] OFAC — АҚШ Молия вазирлигининг Ташқи активларни назорат қилиш бошқармаси билан бевосита ишлаб турибмиз. Халқаро ҳуқуқшунос жалб қилинган, LUKOIL масаласида ҳам бирга ишлаяпмиз», - деди Энергетика вазири Жўрабек Мирзамаҳмудов.
Санкциялар остида қолган LUKOIL
АҚШ Молия вазирлиги яқинда LUKOIL ва унинг шўба тузилмаларини санкциялар рўйхатига киритган эди. Қўшма Штатлар компанияга операцияларни якунлаш учун бир ой муҳлат берди. Бу ҳолат ортидан LUKOIL ўзининг халқаро активларини сотиш режасини билдирганди.
Аввалроқ Швейцариянинг Gunvor Group трейдери «LUKOIL International GmbH»ни сотиб олиш бўйича таклиф берган, аммо 7 ноябр куни компания бу режадан воз кечганини маълум қилди. Бу қарор АҚШ Молия вазирлиги Gunvor'ни Россия билан алоқалар ҳақида огоҳлантирганидан кейин қабул қилинган.
Аввалроқ Яқинда АҚШ Молия вазирлиги Американинг янги санкциялар пакетига LUKOIL ва унинг шўба тузилмаларини киритди. Қўшма Штатлар LUKOIL ва унинг 50 фоизи ва ундан кўп улушга эга бўлган шўба корхоналари билан операцияларни якунлаш учун бир ой муҳлат берди. Шундан сўнг, LUKOIL чеклов чоралари жорий этилиши муносабати билан ўзининг халқаро активларини сотиш ниятида эканлигини маълум қилди.
30 октябр куни LUKOIL Gunvor group халқаро нефт трейдинг компаниясидан Россия компаниясининг хорижий активларига эгалик қилувчи LUKOIL International GmbH компаниясини сотиб олиш бўйича таклиф олганини эълон қилди. Таъкидлаш жоизки, Швецариянинг Gunvor Group хомашё трейдерига россиялик олигарх Геннадий Тимченко ва унинг швециялик ҳамкори Торберн Тернквист асос солган.
Бироқ, 7 ноябр куни Gunvor ўз таклифини қайтариб олишини маълум қилди. Компания ушбу баёнотни АҚШ Молия вазирлиги унинг Россия билан алоқалари ҳақида хабар берганидан ва Россия-Украина уруши давом этаётган бир пайтда Gunvor бизнес юритиш учун лицензия олмаслиги тўғрисида огоҳлантирганидан сўнг берди.
LUKOIL 11 мамлакатда, жумладан, Болгария, Руминия ва Нидерландиядаги нефтни қайта ишлаш заводлари, Европадаги АЁҚШ тармоғи, Озарбойжон, Қозоғистон, Ўзбекистон, Ироқ, Миср, БАА, шунингдек, Африка ва Лотин Америкаси мамлакатларидаги нефт қазиб олиш лойиҳалари каби активларга эгалик қилади.
