Ўзбекистонда 70 га яқин сайт блокланди: улар қимор ўйинларини реклама қилган
Букмекерлик хизматларини тарғиб қилган 86 та сайт ҳақида маълумотлар назорат органларига юборилиб, шундан 70 га яқини мамлакат ҳудудида расман блокланди.
Рақобат қўмитаси маълум қилишича, букмекерлик хизматларини реклама қилувчи веб-сайтларни аниқлаш бўйича тегишли идоралар билан ҳамкорликда ноқонуний тарғиботни чеклаш мақсадида сайтларга киришни блоклаш чоралари амалга оширилмоқда.
Жорий йил давомида ўтказилган ўрганишлар натижасида 86 та сайт бўйича материаллар назорат органларига юборилган. Шуларнинг 70 га яқини белгиланган тартибда блоклангани маълум қилинди. Қўмита бу йўналишдаги назоратни изчил давом эттиришини билдирган.
Амалдаги «Реклама тўғрисида»ги қонуннинг 46-моддасига мувофиқ, қимор ва таваккалчиликка асосланган ўйинлар рекламаси ман этилган. Мазкур чекловни бузган ресурслар қонунчилик асосида белгиланган тартибда тўхтатиб борилмоқда.
Тадбирлар онлайн маконда хавфсизликни таъминлаш, фойдаланувчиларни ноқонуний хизматлар таъсиридан ҳимоя қилиш ҳамда реклама қоидаларига риоя этилишини кучайтиришга қаратилган.
Аввалроқ «One More» масъулияти чекланган жамияти, яъни «Brasserie» кафесида монитор орқали букмекерликка оид ахборот тарқатилишига оид қонунбузарлик аломатлари бўйича иш қўзғатилган эди.
