O‘zbekistonda barqaror tadbirkorlar soni ortmoqda: 2 mingdan ziyod biznes yuqori reytingga ega

O‘zbekistonda tadbirkorlik subyektlarini baholashning yangi tizimi o‘z samarasini bermoqda. Rasmiy ma’lumotlarga ko‘ra, hozirda mamlakatda 2 100 ta tadbirkor yuqori barqarorlik reytingida turibdi. Umumiy manzarani tahlil qilganda, 64,4 ming tadbirkor o‘rta darajadagi, 226,2 ming nafari qoniqarli va 294,7 ming nafari past reytingli toifaga kiritilgan. Yuqori reytingli tadbirkorlar sonining 1,3 baravarga ko‘payishi biznes sohasida boshqaruv sifati yaxshilanayotganini anglatadi, deb yozmoqda UzDaily.uz.

Sohalar kesimida eng yuqori ko‘rsatkich savdo sohasida kuzatilmoqda — 690 ta korxona yuqori reytingga ega. Xizmat ko‘rsatish sohasi 654 ta korxona bilan ikkinchi o‘rinda, sanoat tarmog‘i esa 506 ta korxona bilan kuchli uchlikni yakunlab bergan. Shuningdek, qishloq xo‘jaligida 106 ta va qurilish sohasida 59 ta barqaror korxona faoliyat yuritmoqda.

Hududiy yetakchilik va rivojlanish

Barqaror tadbirkorlarning hududiy taqsimotida Toshkent shahri mutlaq yetakchilik qilmoqda — poytaxtda 709 ta yuqori reytingli biznes subyekti mavjud. Keyingi o‘rinlarni Toshkent viloyati (258 ta), Samarqand viloyati (180 ta) va Farg‘ona viloyati (152 ta) egallab turibdi. Bu hududlardagi qulay infratuzilma va bozor imkoniyatlari tadbirkorlarning barqaror o‘sishiga xizmat qilmoqda.

Reyting tizimi nafaqat statistik hisobot, balki tadbirkorlar uchun turli imtiyoz va yengilliklar eshigini ham ochadi. Yuqori reytingga ega bo‘lgan biznes vakillari uchun soliq tekshiruvlarining kamayishi, davlat xaridlarida ustuvorlik berilishi kabi rag‘batlantirish choralari ko‘zda tutilgan.

Bu esa o‘z navbatida boshqa tadbirkorlarni ham o‘z faoliyatini shaffoflashtirishga va boshqaruv sifatini oshirishga undaydi.

Avvalroq, ayrim tadbirkorlar 2030-yilgacha soliqlardan ozod qilinishi haqida xabar bergan edik.