Ўзбекистонда вакцина олган инсонлар ҳаёти хавф остида экани рад этилди

Ижтимоий тармоқларда коронавирусга қарши вакцина олган инсонлар ҳаёти хавф остида экани, шунингдек, эмлаш онкологик касалликларга сабаб бўлиши мумкинлиги ҳақидаги хабарлар кенг тарқалди. Санитария-эпидемиологик осойишталик ва жамоат саломатлиги қўмитаси раисининг биринчи ўринбосари Нурмат Отабеков ушбу маълумотлар юзасидан расмий муносабат билдириб, бу маълумотлар асоссиз эканини айтди.

Унинг таъкидлашича, пандемия бошланганидан буён дунё бўйича 710 миллионга яқин киши коронавирусга чалинган ва 7 миллиондан ортиғи вафот этган. Агар вакцина ишлаб чиқилмаган ва оммавий эмлаш ишлари тизимли олиб борилмаганида, бу кўрсаткичлар анча юқори бўлиши мумкин эди.

Нурмат Отабеков қўлланилган вакциналар инсон геномига салбий таъсир кўрсатмаслигини алоҳида қайд этди. Айрим одамларда эмлашдан кейин нафас олиш қийинлашуви, тана ҳарорати ошиши ёки юрак уриши тезлашиши каби белгилар кузатилган бўлиши мумкин. Бироқ бундай ҳолатлар вақтинчалик бўлиб, одатда эмлангандан сўнг 2–3 кун ичида бартараф бўлади.

Шунингдек, тарқалган айрим материалларда вакцинадан кейинги ҳолатларни йўқотиш учун карабаш ва арслонпанжаси гиёҳларидан фойдаланиш тавсия этилган. Мутахассислар бундай фикрлар илмий асосга эга эмаслигини, ушбу гиёҳлар иммунитетга таъсир кўрсатмаслигини билдирди.

«Пандемия даврида бир қатор вакциналар қўлланилиб, эпидемик вазият юмшатилди, муҳими, дунё бўйича миллионлаб инсонлар ҳаёти сақлаб қолинди. Шундай экан, бу каби хабарни тарқатиш ҳамда бундай маълумотларга ишонишдан олдин мутахассис билан маслаҳатлашиш мақсадга мувофиқ, деб биламиз»,— дейди Отабеков.