O‘zbekistonga gaz va benzin importi keskin oshdi: Propan xaridi 3,8 barobarga ko‘paygan

O‘zbekistonga 2026 yilning yanvar–sentabr oylarida neft, neft mahsulotlari va shunga o‘xshash materiallar importi 1,558 milliard AQSH dollarini tashkil etib, o‘tgan yilning mos davriga nisbatan 6 foizga ko‘paydi. Bu haqda O‘zbekiston Respublikasi Milliy statistika qo‘mitasi ma’lum qildi.

Ushbu tovarlar guruhida to‘qqiz oy davomida benzin importi 33,6 foizga oshib, 454 million dollarga yetgan. Dizel yonilg‘isi importi esa 19,1 foizga kamayib, 189,1 million dollarni tashkil qilgan.

Umuman olganda, yonilg‘i va moylash materiallari yetkazib berish hajmi 1,152 milliard dollarga teng bo‘lib, bu bir yil avvalgi ko‘rsatkichdan 0,1 foizga kam bo‘lgan.

Qayd etilishicha, mineral yonilg‘i, moylash moylari va shunga o‘xshash materiallar importi jami 3,369 milliard dollarga yetib, 21,6 foizga o‘sgan. Ushbu guruhning umumiy importdagi ulushi 8,1 foizdan 8,5 foizga ko‘tarilgan.

Tabiiy gaz va propan importida o‘sish

Mazkur guruh tarkibida tabiiy va sun’iy gaz importi 1,605 milliard dollarni tashkil etib, o‘tgan yilga nisbatan 49,9 foizga oshgan.

Suyultirilgan gaz (propan) importi esa 3,8 barobarga ko‘payib, 152,2 million dollarga yetgan.

Ko‘mir, koks va briketlar yetkazib berish hajmi 144,2 million dollarni tashkil qilib, 1,7 foizga kamaygan. Elektr toki importi esa 25 foizga qisqarib, 61,8 million dollarga tushgan.

Shuningdek, 2026 yil yanvar–sentabr oylarida O‘zbekistonga tovarlar va xizmatlar importining umumiy hajmi 39,6 milliard dollarni tashkil etgan va bu o‘tgan yilning mos davriga nisbatan 15,7 foizga ko‘p. Mamlakatga tovarlar va xizmatlar jami 160 dan ortiq davlatdan yetkazib berilgan.

Ma’lum qilinishicha, O‘zbekiston tashqi bozorga 672,5 million dollarlik neft, neft mahsulotlari va shunga o‘xshash materiallarni eksport qilgan. Bu ko‘rsatkich 2025 yilning yanvar–sentabr oylariga nisbatan 44,4 foizga oshgan.