Қайси суғурта компанияси энг кўп фойда олди?

Ўзбекистон суғурта бозори иштирокчилари биринчи чорак якунлари бўйича молиявий натижаларини эълон қилди. «Insurer” канали муаллифи томонидан ўтказилган таҳлилга кўра, ҳисобот топширган 35 та суғурта ташкилотининг умумий соф фойдаси 276 млрд сўмни ташкил этган.

Таҳлил натижалари суғурта секторининг молиявий барқарорлиги мустаҳкамланаётганини кўрсатмоқда. Ўтган йилнинг мос даври билан таққослаганда, компанияларнинг жами соф фойдаси икки баробардан кўпроққа ошган.

Биринчи чоракни фойда билан якунлаган компаниялар сони мутлақ кўпчиликни ташкил этди. Фақат «Euroasia Life Insurance», «Ishonch» ва «Alskom» суғурта ташкилотлари ушбу даврни зарар билан якунлаган.

Энг кўп фойда олганлар

2026 йилнинг I чорагида «Apex Insurance» энг юқори молиявий натижани қайд этди. Компания 87,8 млрд сўм соф фойда билан бозор етакчисига айланди. Бу ўтган йилнинг шу даврига нисбатан 53,3 млрд сўмга кўпдир.

Шу билан бирга, фойда ўсиши бўйича энг юқори натижа «Euroasia Insurance» ҳиссасига тўғри келди. Компания соф фойдасини қарийб тўққиз баробарга ошириб, 64 млрд сўмга етказган. Кейинги ўринларда эса «O‘zbekinvest» (20,3 млрд сўм), «Kafolat» (12,9 млрд сўм), «Xalq Sug‘urta» (11,1 млрд сўм) компаниялари жой олган.

Ўсиш суръати жиҳатидан «MY-INSURANCE» ҳамда «TEMIRYO‘L-SUG‘URTA» компаниялари етакчи бўлди. Уларнинг кўрсаткичлари бир йил олдинги даврга нисбатан мос равишда 68 ва 55 баробарга ошган.

Айрим компанияларда пасайиш кузатилди

Шу билан бирга, барча иштирокчиларда ҳам ижобий динамика қайд этилмаган. Ҳисобот даврида 12 та суғурта ташкилотининг соф фойдаси ўтган йилнинг мос даврига нисбатан камайган.

Энг катта пасайиш «Alskom» суғурта ташкилотида қайд этилган бўлиб, компания ўтган йилга нисбатан 16 мрлд сўмга яқин зарар кўрган.