Қирғизистон Миллий банки активлари салкам 9,5 миллиард долларга етди

2026-йилнинг иккинчи чораги якунларига кўра, Қирғизистон Миллий банкининг активлари 830,4 миллиард сомни (9,5 миллиард доллар) ташкил этди. Бир йил аввал бу кўрсаткич 713,1 миллиард сом (8,15 миллиард доллар) эди. Шундай қилиб, бир йил ичида регулятор активлари 117 миллиард сомдан кўпроққа (1,34 миллиард доллар), яъни қарийб 16 фоизга ошган. Бу маълумотлар Қирғизистон Миллий банкининг жорий йил иккинчи чорак бўйича ҳисоботида келтирилган.

Активларнинг асосий ўсиши монетар олтин ҳисобига таъминланган. Миллий банк балансидаги олтиннинг қиймати 2025-йил июнь ойи охиридаги 358 миллиард сомдан (4,09 миллиард доллар) 2026-йил 30-июнь ҳолатига 551,2 миллиард сомгача (6,3 миллиард доллар) ошган. Бу 193 миллиард сомдан ортиқ (2,21 миллиард доллар) ўсиш дегани.

Шу билан бирга, кассадаги маблағлар, банклар ва бошқа молиявий ташкилотлардаги пул маблағлари аксинча, деярли икки баравар камайган — 163,4 миллиард сомдан (1,87 миллиард доллар) 85,4 миллиард сомгача (977 миллион доллар) тушган.

Миллий банк томонидан чиқарилган қарз қимматли қоғозлари ҳажми ҳам сезиларли ошган. Уларнинг қиймати 11 миллиард сомдан (125,8 миллион доллар) 53,2 миллиард сомгача (608,3 миллион доллар) кўпайган. Муомаладаги банкнот ва тангалар ҳажми ҳам ошган: 275,3 миллиард сомдан (3,15 миллиард доллар) 317 миллиард сомгача (3,62 миллиард доллар) етган. Тижорат банклари ва бошқа молиявий ташкилотларнинг Миллий банкдаги ҳисобварақларидаги маблағлари 168,9 миллиард сомгача (1,93 миллиард доллар) кўтарилган. Шу билан бирга, ҳукумат (Вазирлар Маҳкамаси) маблағлари 98,1 миллиард сомдан (1,12 миллиард доллар) 79,8 миллиард сомгача (912,5 миллион доллар) камайган.

Ҳисобот даври якунларига кўра, Қирғизистон Миллий банкининг фойдаси 41,5 миллиард сомни (474,6 миллион доллар) ташкил қилган. Бир йил аввал эса бу кўрсаткич 19,5 миллиард сом (223 миллион доллар) эди. Яъни банк фойдаси икки баравардан кўпроққа ошган. Миллий банкнинг жами капитали 157,9 миллиард сомдан (1,81 миллиард доллар) 186,3 миллиард сомгача (2,13 миллиард доллар) кўпайган. Мажбуриятлари эса 555,3 миллиард сомдан (6,35 миллиард доллар) 644 миллиард сомгача (7,36 миллиард доллар) ошган.

Эслатиб ўтамиз, Қирғизистон 2025-йилда Евроосиё иқтисодий иттифоқи мамлакатлари орасида валюта бозори энг тез ўсган мамлакат бўлганди.