Қирғизистоннинг савдо ҳажми беш ойда қарийб 6,3 миллиард долларни ташкил этди

2026-йил январь–май ойларида Қирғизистоннинг ташқи ва ўзаро савдо айланмаси 6 миллиард 257 миллион долларни ташкил этди. Савдо ҳамкорлари географияси ташқи савдонинг юқори даражада бир нечта давлатларга жамланганини кўрсатмоқда: мамлакатнинг барча ташқи савдо операцияларининг 67 фоиздан ортиғи атиги учта давлат ҳиссасига тўғри келади. Бу ҳақда Миллий статистика қўмитаси маълумотларида келтирилган.

Қирғизистоннинг асосий савдо ҳамкорлари

Хитой — Қирғизистоннинг энг йирик савдо ҳамкори бўлиб қолмоқда. Икки давлат ўртасидаги товар айланмаси 2 миллиард 89,8 миллион долларни ташкил этди. Бу умумий савдо ҳажмининг 33,4 фоизига тенг. Россия билан савдо айланмаси 1 миллиард 581,6 миллион долларни ташкил қилди. Унинг умумий савдодаги улуши 25,3 фоизни ташкил этди. Қозоғистон эса 538,3 миллион долларлик кўрсаткич билан учинчи ўринни эгаллади. Унинг улуши 8,6 фоизни ташкил этди.

Евроосиё иқтисодий иттифоқи давлатлари ҳиссасига Қирғизистоннинг умумий савдо айланмасининг 38,7 фоизи тўғри келди. Бу кўрсаткич 2 миллиард 421,5 миллион долларни ташкил этди.

Қирғизистон маҳсулотлари қаерга экспорт қилинмоқда?

Беш ой давомида умумий экспорт ҳажми 847,1 миллион долларни ташкил этди. Шу даврда экспорт қилинган маҳсулотларнинг ярмидан кўпи — 52,8 фоизи ЁИИ давлатлари бозорларига етказиб берилди.

Қирғизистон маҳсулотларининг асосий харидорлари

Россия Қирғизистон маҳсулотларини 246,4 миллион долларга сотиб олди. Бу умумий экспорт ҳажмининг 29,1 фоизини ташкил этади. Қозоғистон 198,8 миллион долларлик маҳсулот харид қилди (Бу йўналишда анъанавий равишда қимматбаҳо металлар экспорти 23,5 фоиз). Швейцария Қирғизистон маҳсулотларини 159,2 миллион доллар миқдорида импорт қилди (18,8 фоиз). Бу йўналишда анъанавий равишда қимматбаҳо металлар экспорти устунлик қилади. Ўзбекистон 100,3 миллион долларлик маҳсулот харид қилди (11,8 фоиз).

Қирғизистонга товарлар қаердан олиб келинмоқда?

Қирғизистонга хориждан олиб кирилган маҳсулотлар ҳажми 5 миллиард 409,9 миллион долларни ташкил этди. Мамлакат импортининг қарийб 69 фоизи атиги учта давлат ҳиссасига тўғри келади. Хитой Қирғизистон импортининг энг йирик манбаи бўлиб, умумий импортнинг 38 фоизини ташкил этди. Хитойдан Қирғизистонга 2 миллиард 57 миллион долларлик маҳсулот етказиб берилди.

Шу билан бирга, Қирғизистоннинг Хитойга экспорти атиги 32,9 миллион долларни ташкил қилган. Бу икки давлат ўртасидаги савдода катта номутаносиблик мавжудлигини кўрсатади. Россия Қирғизистон импортининг 24,7 фоизини таъминлади. Россиядан мамлакатга 1 миллиард 335,2 миллион долларлик маҳсулот олиб кирилди. Қозоғистон эса Қирғизистонга 339,5 миллион долларлик маҳсулот етказиб берди. Бу мамлакат умумий импорт бозорининг 6,3 фоизини ташкил этди.

Савдо сальдоси нима ва нега у манфий?

Мамлакатнинг беш ой давомида умумий ташқи савдо айланмаси 6 миллиард 257 миллион долларни ташкил этди. Бироқ савдо таркибида катта номутаносиблик мавжуд. Қирғизистон хориждан 5 миллиард 409,9 миллион долларлик маҳсулот импорт қилди. Мамлакат экспорт қилган маҳсулотлар ҳажми эса атиги 847,1 миллион долларни ташкил этди. Натижада Қирғизистоннинг ташқи савдо сальдоси минус 4 миллиард 562,8 миллион долларни ташкил этди.

Оддий қилиб айтганда, бу — мамлакат хорижий маҳсулотларни сотиб олишга ўз маҳсулотларини чет элга сотишдан топаётган даромадига қараганда 6,4 баробар кўпроқ маблағ сарфлаётганини англатади.

Маълумот учун, савдо сальдоси — бу мамлакатнинг экспорт ва импорт ҳажми ўртасидаги фарқ. Агар экспорт импортдан кўп бўлса — ижобий сальдо, аксинча импорт кўп бўлса — салбий сальдо юзага келади.

Эслатиб ўтамиз, Қирғизистон иқтисодиёти 2026-йилнинг январь–май ойларида ўтган йилнинг шу даврига нисбатан 12,2 фоизга ўсди.