Россияда бир ойда 14,6 минг нафар чет эллик депортация қилинди

Россия Ички ишлар вазирлиги июнь ойида ўтказилган «Нелегал-2026» федерал тезкор-профилактик операциясининг биринчи босқичи якунларини эълон қилди.

Вазирлик расмий вакили Ирина Волк маълум қилишича, операция давомида миграция соҳасида 60,2 мингта қонунбузарлик аниқланган.

Натижада 14,6 минг нафар хорижий фуқаро маъмурий тартибда мамлакатдан чиқариб юборилган ёки депортация қилинган. Шунингдек, яна 29,3 минг нафар чет элликнинг Россияга кириши тақиқланган.

Текширувлар давомида хорижликларни ноқонуний ишга жалб қилган 10,4 минг нафар иш берувчи маъмурий жавобгарликка тортилди.

Бундан ташқари, миграция билан боғлиқ ҳуқуқбузарликлар юзасидан 2 мингта жиноят иши қўзғатилган. Шунингдек, қидирувда бўлган 301 нафар шахс аниқланган.

Россия ИИВ маълумотига кўра, рейдлар давомида асосий эътибор хорижликлар зич яшайдиган ҳудудлар, улар меҳнат қилаётган объектлар, шу жумладан йўловчи ташиш ва товар етказиб бериш соҳаларидаги фаолиятга қаратилган.

«Нелегал-2026» операциясининг биринчи босқичи жорий йил июнь ойида Коллектив хавфсизлик шартномаси ташкилоти (КХШТ) ҳомийлигида Россия ИИВ, ФХХ ва Росфинмониторинг ҳамкорлигида ўтказилган.

Вазирлик таъкидлашича, операциядан кўзланган асосий мақсад ноқонуний миграцияга қарши курашиш, ушбу йўналишда фаолият юритувчи уюшган жиноий гуруҳлар фаолиятига чек қўйиш ҳамда қидирувдаги шахсларни аниқлашдан иборат.

Эслатиб ўтамиз, июнь ойида Россия президенти Владимир Путин миграция хизматлари учун давлат божлар кескин оширилиши тўғрисидаги қонунни имзоланганди.

Қонунга кўра, Россия фуқаролигини олиш ёки ундан чиқиш учун давлат божи 4,2 минг рублдан 50 минг рублгача оширилади. Яшаш гувоҳномасини расмийлаштириш учун тўлов эса 6 минг рублдан 30 минг рублгача кўтарилади.