Siyyarto va Lavrovning Alisher Usmonov bo‘yicha suhbati fosh bo‘ldi

Xalqaro surishtiruvchi jurnalistlar konsorsiumi («Vsquare», «The Insider» va boshqalar) Vengriya TIV rahbari Peter Siyyarto va Rossiya TIV rahbari Sergey Lavrov o‘rtasidagi audioyozuvni e’lon qildi. 2024 yil avgust oyida bo‘lib o‘tgan ushbu suhbatda Lavrov rossiyalik oligarx Alisher Usmonovning iltimosini yetkazgan. Usmonov o‘zining singlisi — Gulbahor Ismoilovani Yevropa Ittifoqining sanksiyalar ro‘yxatidan chiqarishni so‘ragan.

«Ha, albatta. Biz Slovakiya bilan birgalikda uni ro‘yxatdan chiqarish bo‘yicha Yevropa Ittifoqiga taklif kiritamiz. Kelasi hafta bu masala kun tartibiga kiritiladi va biz uni chiqarib tashlash uchun qo‘limizdan kelgan barcha ishni qilamiz», — deb va’da bergan Siyyarto bu iltimosga javoban.

Suhbat yakunida Vengriya diplomati Lavrovga qarata: «Men doimo xizmatingizdaman», — deya ta’kidlagan. Oradan yetti oy o‘tib, Gulbahor Ismoilova chindan ham YI sanksiyalaridan ozod qilingan.

Siyyartoning keskin munosabati

Peter Siyyarto ushbu audioyozuv tarqalgach, «Facebook» orqali munosabat bildirdi. U chet el razvedka xizmatlari vengriyalik jurnalistlar yordamida uning telefonini tinglayotganidan anchadan beri xabardor ekanini aytdi. Siyyarto o‘z harakatlarini sanksiyalar siyosatining «muvaffaqiyatsizligi» va bu cheklovlar Rossiyadan ko‘ra Yevropa Ittifoqiga ko‘proq zarar yetkazayotgani bilan izohladi.

Vengriyalik vazirning ta’kidlashicha, u YIga a’zo bo‘lmagan ko‘plab davlatlar vazirlari bilan sanksiyalar bo‘yicha muntazam maslahatlashuvlar o‘tkazib keladi. «Razvedkachilar muhim kashfiyot qilishibdi: ular mening omma oldida aytadigan gaplarim telefondagi gaplarim bilan bir xil ekanini isbotlashdi. Ajoyib ish!», — deya kinoya qilgan Siyyarto.

Ittifoqchilar o‘rtasidagi shubha

Bu voqea Vengriya va uning Yevropa Ittifoqi hamda NATOdagi ittifoqchilari o‘rtasidagi ishonchsizlikni yanada kuchaytirishi mumkin. Surishtiruvda ishtirok etgan nashrlarning qayd etishicha, Vengriyaning Rossiya bilan bunday yaqin aloqalari va sanksiyalar ro‘yxatiga ta’sir o‘tkazishga urinishi YIning yagona tashqi siyosatiga zid keladi.

Alisher Usmonov Rossiya prezidenti Vladimir Putinga eng yaqin biznesmenlardan biri hisoblanadi. Uning singlisi Gulbahor Ismoilovaning sanksiyadan chiqarilishi Vengriyaning Kreml manfaatlarini Yevropada himoya qilish borasidagi navbatdagi qadami sifatida baholanmoqda. Bu mojaro Budapeshtning Brussel bilan munosabatlarini yanada taranglashtirishi kutilmoqda.