«SpaceX», «OpenAI», «Anthropic»: 2026 йилда кутилган энг йирик беш IPO

2026 йилда IPO бозори кучли кўтарилишни бошдан кечириши мумкин: биржага аэрокосмик компания «SpaceX» ҳамда оммабоп чат-ботлар ишлаб чиқувчи иккита компания — «OpenAI» ва «Anthropic» чиқишга тайёргарлик кўрмоқда. Шу билан бирга, «SpaceX» ва «OpenAI»нинг жойлаштирилиши тарихдаги энг йирик IPO мақоми учун рақобатлашиши мумкин. Барча компаниялар ҳозирча IPO’га тайёргарликнинг турли босқичларида турибди, муддатлар ва параметрлар эса бозор конъюнктураси ҳамда бизнес ўсиши суръатларига боғлиқ бўлади.

«SpaceX»

Дунёдаги энг қиммат аэрокосмик компания 2026 йилнинг ўрталарида ёки иккинчи ярмида биржага чиқиш имкониятини кўриб чиқмоқда ва 30 млрд доллардан ортиқ маблағ жалб этишни режалаштирмоқда. Бу ҳақда декабр ойи бошида «Bloomberg» манбалари хабар берган, кейинчалик «SpaceX» раҳбари Илон Маск бу маълумотни «аниқ» деб атаган.

Ушбу жойлаштириш тарихдаги энг йиригига айланиши мумкин. У 2019 йилда IPO орқали 29 млрд доллар жалб этган «Saudi Aramco» рекордини ортда қолдириши эҳтимолдан холи эмас. Агентлик ёзишича, IPO натижасида «SpaceX»нинг бозор қиймати 1,5 трлн долларга етиши мумкин. Бу компаниянинг сўнгги баҳосидан деярли икки баробар юқори.

Биржада жалб этиладиган маблағларнинг бир қисми сунъий йўлдошлар тармоғи «Starlink» учун космосда дата-марказлар қуришга йўналтирилиши режалаштирилгани ҳам маълум қилинган.

Воқеаларни башорат қилиш платформаси Polymarket иштирокчилари «SpaceX»нинг 2026 йилда IPO ўтказиш эҳтимолини 81 фоиз деб баҳоламоқда, деб ёзади Benzinga. Ҳатто компаниянинг келажакдаги тикери бўйича ҳам ставкалар қилинмоқда. Энг оммабоп вариантлар — $X, $SEX ва $SX.

«OpenAI»

«ChatGPT» ишлаб чиқувчиси бўлган «OpenAI» 2025 йил давомида энг қиммат нодавлат компания мақоми учун «SpaceX» билан рақобат қилган ҳолда, биржага чиқиш имкониятини ҳам кўриб чиқмоқда. «Reuters» манбаларига кўра, жойлаштириш чоғида «OpenAI»нинг эҳтимолий баҳоси 1 трлн долларгача етиши мумкин. Бу эса уни оммавий бозорлар тарихидаги энг қиммат дебютантлардан бирига айлантиради.

Таққослаш учун: декабр ойи ўртасида «The Wall Street Journal» манбалари «OpenAI»нинг навбатдаги инвестиция раундига тайёргарлик кўраётгани ҳақида хабар берган эди. Ушбу раунд компанияни 830 млрд долларгача баҳолаши мумкинлиги қайд этилган эди.

«Reuters» маълумотларига кўра, «OpenAI» регуляторларга ҳужжатларни 2026 йилнинг иккинчи ярмида тақдим этиши мумкин. Нашр қайд этишича, компаниянинг молия директори Сара Фрайер яқин атрофидагиларга листингни 2027 йилга мўлжаллаётганини айтган. Бироқ айрим маслаҳатчилар биржага чиқиш муддати эртароқ — 2026 йил охирига яқин бўлиши мумкинлигини ҳам истисно этмаяпти. Дастлабки муҳокамалар доирасида «OpenAI» диапазоннинг қуйи чегараси бўйича тахминан 60 млрд доллар жалб этиш вариантини кўриб чиққан.

«Anthropic»

«Claude» чат-боти ишлаб чиқувчиси ва «OpenAI»нинг рақобатчиси ҳисобланган «Anthropic» 2026 йилда IPO ўтказиш бўйича дастлабки музокаралар олиб бормоқда. Бу ҳақда декабр ойи бошида «Financial Times» ўз манбаларига таяниб хабар қилганди. Нашр маълумотларига кўра, стартап қўшимча хусусий молиялаштириш раунди ўтказиш имкониятини ҳам кўриб чиқмоқда.

Эҳтимолий листингнинг аниқ параметрлари ҳозирча очиқланмаган. Маълумки, сентябр ойида «Anthropic» серия F раунди доирасида 13 млрд доллар жалб қилган, шундан сўнг компания баҳоси 183 млрд долларга етган.

Компания ҳамкорлар доирасини фаол кенгайтирмоқда. Хусусан, «Google» билан 1 млнта ихтисослашган TPU процессори ва 1 GWдан ортиқ ҳисоблаш қувватларидан фойдаланиш бўйича келишув имзоланган. Шунингдек, «Claude» «IBM»нинг корпоратив сунъий интеллект маҳсулотларига интеграция қилинган ва «Microsoft» билан ҳамкорлик йўлга қўйилган.

«Kraken»

Дунёдаги энг йирик криптовалюта биржаларидан бири ҳисобланган Kraken ҳам листинг ўтказиш имкониятини ўрганмоқда. CNBC маълумотларига кўра, платформа 2026 йилнинг биринчи чорагида IPO ўтказиш вариантларини кўриб чиқмоқда. Келажакдаги жойлаштириш параметрлари — ҳажм ва нарх диапазони ҳозирча аниқланмаган.

«Reuters»нинг хабар беришича, 2025 йил ноябрида «Kraken» бизнесини 20 млрд долларга баҳолаган ҳолда 800 млн доллар жалб қилган. Олинган маблағлар халқаро бозорларда иштирокни кенгайтириш ва тўлов хизматларини ривожлантиришга йўналтирилиши режалаштирилган.

Ҳозирда «Kraken» қўшилиш ва қўшимча харидлар орқали бизнесини фаол кенгайтирмоқда. Хусусан, май ойида у чакана фючерслар савдоси платформаси «NinjaTrader»ни 1,5 млрд долларга сотиб олган. Октябр ойида эса «IG Group»дан фючерс биржаси «Small Exchange»ни 100 млн долларга харид қилган.

«Discord»

Асосан геймерларга мўлжалланган мулоқот иловаси яратувчиси «Discord» бир неча йилдан бери IPO’га эҳтимолий номзодлар қаторида тилга олиб келинмоқда. Компаниянинг биржага чиқиши ҳақидаги миш-мишлар камида 2022 йилдан буён айланиб юради.

2025 йил март ойида «Bloomberg» «Discord» инвестиция банклари билан эҳтимолий жойлаштириш бўйича маслаҳатлашувларни бошлагани ва ҳатто ўша йилнинг ўзида биржага чиқишни истисно этмаётганини хабар қилган эди. Шу билан бирга, муддатлар сурилиши мумкинлиги ҳам қайд этилган.

Октябр ойида эса «Morningstar» «Discord» IPO’сига оид кутилмаларни яна бир бор эслатган, бироқ аниқ сана келтирмаган. Шундан бери листингга тайёргарлик бўйича янги тасдиқланган маълумотлар пайдо бўлмади.

2015 йилда асос солинган «Discord»нинг охирги оммавий маълум бўлган баҳоси 2021 йилдаги инвестиция раунди якунларига кўра тахминан 15 млрд долларни ташкил этган. Компания вакили аввалроқ «Discord» ўзининг келажак режаларига нисбатан юқори қизиқишни англашини, бироқ листинг ҳақидаги миш-мишларга изоҳ бермаслигини, асосий эътибор эса маҳсулотни ривожлантириш ва бизнес барқарорлигига қаратилганини таъкидлаган.