Тожикистон ташқи савдоси 21 фоизга ўсди, аммо дефицит кучайди

2026-йил январ–апрел ойларида Тожикистоннинг ташқи савдо айланмаси 3,769 млрд долларни ташкил қилди. Бу ўтган йилнинг шу даврига нисбатан 21 фоизга кўп, дея хабар берди мамлакат президенти ҳузуридаги Статистика агентлиги.

Шу билан бирга, савдо баланси кескин манфий шаклланди: дефицит 2,395 млрд долларни ташкил этди.
Тожикистон ушбу даврда дунёнинг 119 та мамлакати билан савдо қилди. Мамлакатнинг асосий савдо ҳамкорлари Хитой, Россия, Қозоғистон, Ўзбекистон ва Эрон бўлиб қолмоқда.

Экспорт
Жорий йилнинг тўрт ойида республика 687 млн долларлик товар экспорт қилди. Бу 2025-йил январ–апрел ойларига нисбатан 8,1 фоизга ёки 51,5 млн долларга кўпдир.

Экспорт ўсиши асосан минерал маҳсулотлар ҳисобига таъминланди – уларнинг етказиб берилиши 1,6 бараварга ёки 119,2 млн долларга ошди. Шунингдек, қимматбаҳо ва ярим қимматбаҳо тошлар ҳамда металлар экспорти 7,3 бараварга (7,6 млн долларга), ўсимлик маҳсулотлари 1,6 бараварга (9,4 млн долларга), тўқимачилик ва тўқимачилик маҳсулотлари эса 11,6 фоизга (8,2 млн долларга) кўпайди.

Пахта толаси экспорти 13,1 фоизга ёки 5,5 млн долларга ошди. Машина, ускуна ва механизмлар етказиб бериш ҳажми 11,5 бараварга (13 млн долларга), транспорт воситалари экспорти эса 3,7 бараварга (3,5 млн долларга) ўсди.

Айни пайтда, қимматбаҳо бўлмаган металлар ва улардан тайёрланган маҳсулотлар экспорти 75,1 млн долларга, кимё саноати маҳсулотлари 1,1 млн долларга, тирик ҳайвонлар ва ҳайвонот маҳсулотлари эса 0,7 млн долларга қисқарди.

2026-йил январ–апрел ойларида тожик маҳсулотларининг асосий харидорлари Хитой, Туркия, Белгия, Ўзбекистон, Россия, Қозоғистон ва Эрон бўлди.

Импорт

Импорт эса анча юқори суръатда ўсиб, 24,3 фоизга ёки 603,4 млн долларга кўпайди ва 3,82 млрд долларга етди. Шу тариқа, мамлакатга олиб кирилган товарлар ҳажми экспортдан қарийб 4,5 баравар юқори бўлди.

Импорт деярли барча йирик товар гуруҳлари бўйича ошди. Энг катта ўсиш қимматбаҳо бўлмаган металлар ва улардан тайёрланган маҳсулотлар ҳисобига тўғри келди – 187,3 млн доллар. Шунингдек, машина ва ускуналар импорти 136,6 млн долларга, минерал маҳсулотлар 79,9 млн долларга, ўсимлик маҳсулотлари 67 млн долларга, транспорт воситалари эса 52,9 млн долларга кўпайди.

Бундан ташқари, тайёр озиқ-овқат маҳсулотлари, кимёвий маҳсулотлар, пластмасса, ёғоч ва ёғоч маҳсулотлари, тўқимачилик, ёғ-мой маҳсулотлари, шунингдек тирик ҳайвонлар ва ҳайвонот маҳсулотлари импорти ҳам ошди.

Товарлар асосан Россия, Хитой, Қозоғистон, Ўзбекистон, Эрон, Жанубий Корея, Беларус, Туркия ва Германиядан келтирилди.