Тошкент метросининг Ер усти ҳалқа йўлидаги 14 та бекат қўшимча текширувдан ўтказилади
Текширув метронинг «Турон» бекатида шифт қулаганидан бир кун ўтиб эълон қилинди.
Тошкент метросининг Ер усти ҳалқа йўли йўналишида 17−19 июль кунлари поездлар ҳаракати соат 06:00 дан 22:30 гача амалга оширилади. Бу ҳақда пойтахт метрополитени матбуот хизати хабар берди.
Қайд этилишича, ушбу даврда йўналишдаги 14 та бекатнинг конструктив ва техник ҳолати мутахассислар томонидан батафсил текширилади.
Профилактик тадбирлар метрополитен инфратузилмасининг ишончли фаолиятини таъминлаш, унинг техник ҳолатини чуқур таҳлил қилиш ҳамда йўловчилар учун хавфсиз ва қулай шароитларни яратишга қаратилган.
Метрополитен вақтинчалик ноқулайликлар учун йўловчилардан узр сўради.
Маълумот учун, кеча, 16 июл куни Тошкент ер усти метроси «Турон» бекатининг шифт қисми қулаб тушганди. Ҳодиса оқибатида икки йўловчи енгил тан жароҳати олган. Йўловчиларга қулайлик яратиш мақсадида «Қипчоқ» ва «Қурувчилар» метро бекатлари оралиғида бепул метробуслар ҳаракати йўлга қўйилганди.
