Тошкент–Хива йўналишидаги тезюрар поездлар 2026 йилнинг мартидан ишга тушади

Жанубий Кореянинг Hyundai Rotem компанияси ишлаб чиқарган юқори тезликдаги электропоездлар Тошкент–Хива йўналишида 2026 йилнинг иккинчи чорагидан сўнг қатнай бошлайди. Илк таркибнинг Ўзбекистонга 2026 йил январ–феврал ойларида етиб келиши кутилмоқда. Шундан сўнг поездлар уч ой давомида динамик синовлардан ўтказилади ва апрел–июн ойларида биринчи тижорий рейс амалга оширилади.

Янги поездлар «Жалолиддин Мангуберди» деб номланади ва ҳозирги 14 соатлик сафар вақти 7,5 соатгача қисқаради. Тошкент-Хива йўналишининг узунлиги 1286 километрни ташкил этиб, поезднинг ўртача ҳаракат тезлиги 171 km/hʼдан ошади. Максимал тезлик эса 250 km/hʼга етади.

Hyundai Rotem поездлари маҳаллий иқлим шароитларига мослаштирилган. Улар 50 даражагача иссиқ ва минус 40 даражагача совуқ ҳароратларда барқарор ҳаракатлана олади. Чўл ҳудудлари учун мўлжалланган чангдан ҳимояланган конструкция поездларни қумли шамолларда ҳам ишончли қилади.

Ҳар бир электропоезд етти вагондан иборат бўлиб, бешта эконом ва иккита бизнес класс вагонини ўз ичига олади. Умумий узунлиги 175 метр бўлган таркиб 389 нафар йўловчини қабул қила олади. Ушбу поездлар Afrosiyob’га нисбатан қисқароқ бўлса-да, сиғими юқорироқ ҳисобланади.

«Темирйулэкспресс» маълум қилишича, 2027 йилгача яна бешта шундай поезд етказиб берилади. Лойиҳанинг умумий қиймати 185 млн еврони ташкил этиб, молиялаштириш Жанубий Кореянинг Иқтисодий ҳамкорликни ривожлантириш жамғармаси ва Корея экспорт импорт банки орқали амалга оширилмоқда.

Эслатиб ўтамиз, «Жалолиддин Мангуберди» номи берилган янги тезюрар поездлар Hyundai Rotem ва «Ўзбекистон темир йўллари» ўртасида 2024 йил июн ойида имзоланган 200 млн долларлик шартнома доирасида ишлаб чиқарилмоқда.

Аввалроқ Жанубий Кореянинг Чангвон шаҳридаги Масан портида Ўзбекистон учун ишлаб чиқарилган ва «Жалолиддин Мангуберди» номи берилган Hyundai Rotem тезюрар йўловчи поездларининг биринчи партияси расмий тарзда жўнатилгани ҳақида хабар берган эдик.