Трамп нефт билан боғлиқ санкциялар бекор қилинишини айтди

АҚШ президенти Доналд Трамп кеча, 9-март куни Флоридада ўтган матбуот анжуманида Эрон билан уруш «жуда тез орада» якунланишини башорат қилди.

Журналист уруш шу ҳафта тугаши мумкинми, деб сўраганида, Трамп: «Йўқ, лекин тез орада, жуда тез орада», – деб жавоб берди. Унинг қўшимча қилишича, АҚШ операцияси режадан олдин кетмоқда.

АҚШ президенти, шунингдек, Эрондаги уруш туфайли нархлар кескин ошганидан кейин нефт таъминотини таъминлаш ва нархларни тушириш мақсадида нефт билан боғлиқ айрим санкцияларни бекор қилишини билдирди. Теҳрон амалда Ҳўрмуз бўғозини ёпиб қўйган. У Форс кўрфазини океан билан боғлайди ва одатда жаҳон нефт оқимининг қарийб чорак қисми айнан шу ердан ўтади.

«Биз айрим давлатларга санкциялар жорий этганмиз. Ҳўрмуз бўғози очилгунча бу санкцияларни бекор қиламиз», – деди Трамп.

Трамп қайси давлатларга нисбатан санкциялар юмшатилишини айтмади. Бироқ март ойи бошида АҚШ 30 кунлик вақтинчалик рухсатнома чиқариб, Ҳиндистонга денгизда бўлган Россия нефтини харид қилишга рухсат берган эди.

«Уруш деярли тугади»

Бундан олдин 9-март куни «CBS»нинг Оқ уйдаги мухбири Вейжиа Жианг Трамп билан телефон орқали суҳбатдан иқтибос эълон қилди: «Менимча, уруш деярли тугади». Журналистнинг айтишича, Трамп АҚШнинг Эронга қарши операцияси аввал режалаштирилган тўрт-беш ҳафталик муддатдан «жуда катта фарқ билан» олдинда кетаётганини ҳам айтган.

Бу хабар АҚШ фонд бозорида жуда ижобий реакцияга сабаб бўлди. Кун давомида пасайиб бораётган асосий индекслар кескин ўсишга ўтди. «Brent» нефт нархи 9-март куни эрталаб баррели қарийб 120 долларгача кўтарилган бўлса, «CBS» мухбири хабаридан кейин 84 доллардан ҳам пастга тушди.

Трампнинг матбуот анжуманидаги баёнотларидан кейин АҚШ акциялари фючерслари тахминан 0,3 фоизга пасайди.