Хитой ЙИ санкцияларига жавобан 14 та Европа компаниясига экспорт чекловларини жорий қилди

Хитой Европа Иттифоқининг (ЙИ) Россияга қарши қабул қилган 21-пакет санкцияларига жавоб тариқасида 14 та Европа компаниясини экспорт назорати рўйхатига киритди. Бу ҳақда «South China Morning Post» нашри Хитой Савдо вазирлигига таяниб хабар берди.

Маълум қилинишича, бу қарор Европа Иттифоқининг сўнгги санкциялар пакетига жавоб сифатида қабул қилинган. Аввалроқ ЙИ ҳам 14 та Хитой компаниясига нисбатан чекловлар жорий этган эди.

Хитой Савдо вазирлиги баёнотида айтилишича, ушбу қарор мамлакат миллий хавфсизлиги ва давлат манфаатларини ҳимоя қилиш, шунингдек, оммавий қирғин қуроллари тарқалишининг олдини олиш бўйича халқаро мажбуриятларни бажариш мақсадида қабул қилинган. Янги чекловларга кўра, хитойлик экспортчилар мазкур компанияларга икки хил мақсадда қўлланилиши мумкин бўлган (фуқаролик ва ҳарбий соҳада ишлатиладиган) маҳсулотларни етказиб бера олмайди.

Шунингдек, хорижий компаниялар ва жисмоний шахсларга ҳам Хитойда ишлаб чиқарилган шундай маҳсулотларни ушбу компанияларга қайта етказиб бериш тақиқланди.

Вазирлик баёнотида таъкидланишича, чекловлар рўйхатига киритилган компаниялар билан амалга оширилаётган барча амалдаги экспорт операциялари дарҳол тўхтатилиши керак. Рўйхатдан Европа мамлакатларининг бир қатор ҳарбий ва саноат компаниялари ўрин олган. Улар орасида Германиянинг йирик мудофаа концерни «Rheinmetall», Чехиянинг юк автомобиллари ишлаб чиқарувчиси «Tatra Trucks», Италиянинг электр двигателлари ишлаб чиқарувчиси «Lafert», Германиянинг «Sindlhauser Materials», Франциянинг дронлар ишлаб чиқарувчиси «Cavok UAS», Франциянинг «III-V LAB», Нидерландиянинг «IHC Merwede Holding B.V.» ҳамда Литванинг «Ekspla UAB» компаниялари бор.

Эслатиб ўтамиз, Европа Иттифоқининг Россияга қарши қабул қилган 21-пакет санкциялари рўйхатига Қирғизистоннинг учта компанияси ҳам киритилган. Шунингдек, мазкур чекловлар доирасида Қирғизистондаги тижорат банкларидан бири билан молиявий операцияларни амалга ошириш ҳам тақиқланган.