ЕИ Навалний заҳарланган моддани ишлаб чиққанларга қарши санкциялар жорий қилди

Европа Иттифоқи расмийлари кимёвий қуроллар, жумладан, эпибатидин заҳрини ишлаб чиқишга алоқадор бўлган беш нафар россиялик олим ва бир ҳарбийни санкциялар рўйхатига киритди. Айнан мана шу модда колонияда ўлдирилган сиёсатчи Алексей Навалнийнинг организмидан топилган эди.

Санкцияга тушганлар рўйхати:

Игор Бабкин — «Сигнал» илмий маркази лабораторияси мудири;
Сергей Галан — «Сигнал» илмий маркази катта илмий ходими;
Олга Юдина — «Сигнал» илмий маркази катта илмий ходими;
Алексей Аксенов — «Сигнал» илмий маркази илмий ходими;
Ирина Деревягина — Давлат органик кимё ва технологиялар илмий-тадқиқот институти ходими;
Михаил Гуцалюк — полковник, Радиацион, кимёвий ва биологик ҳимоя ҳарбий академиясининг илмий ишларни ташкил этиш бўлими бошлиғи.

Феврал ойида Буюк Британия, Швеция, Франция, Германия ва Нидерландия Навалний Россия колониясида дарахт қурбақаси заҳри — эпибатидин билан заҳарланганини маълум қилган эди.

Сиёсатчининг биоматериал намуналарини ўрганган тадқиқотчилар бир-биридан мустақил равишда шундай хулосага келишган. Россия Ташқи ишлар вазирлиги эса бешта давлатнинг бу хулосаларини «ахборот хуружи» деб атаган.