Ҳар бир вилоят ва пойтахтнинг туманларига Янги Тошкентдан 100 гектардан ер ажратилади
Шунингдек, қиймати 50 миллион доллардан юқори бўлган нотурар жой лойиҳалари учун «яшил» сертификат харажатлари давлат томонидан тўлиқ қопланади. Инвестор сотиб олган ҳар бир ер майдонининг 30 фоизини яшил ҳудудга айлантириш талаби ҳам Янги Тошкентдаги лойиҳаларга қўлланмайди.
© Prezident matbuot xizmatiЯнги Тошкентда ҳар бир вилоят ва пойтахтнинг туманларига 100 гектардан ер ажратилади. Бу ҳақда 12-октябр куни президент Шавкат Мирзиёев у ерда йирик лойиҳаларни амалга ошираётган инвестор ва тадбиркорлар билан учрашувда айтди.
Энди туман ҳокимлари ўз тадбиркорлари билан ишлаб, янги лойиҳаларни шу майдонларга олиб келиши керак. У ерларда амалга оширилган инвестициялар тегишли вилоят ёки пойтахт туманининг кўрсаткичларида ҳисобга олинади.
Бириктирилган ҳудудлардаги ерлар бўйича биринчи аукционда фақат ўша вилоят ёки туман тадбиркорлари қатнашади.
Президент Янги Тошкент бутун мамлакат ишбилармонлари учун янги имконият майдонига айланиши лозимлигини таъкидлади.
«Яшил шаҳар»
Янги Тошкент ҳақиқий «яшил шаҳар» бўлиши шартлиги яна бир бор таъкидланди. Бу ерда қуриладиган объектларга «яшил бино» стандартлари қўлланмоқда. Шу билан бирга, сертификат олиш тадбиркорлар учун қўшимча харажат экани инобатга олинди.
Қиймати 50 миллион доллардан юқори бўлган нотурар жой лойиҳалари учун «яшил» сертификат харажатлари давлат томонидан тўлиқ қопланади. Инвестор сотиб олган ҳар бир ер майдонининг 30 фоизини яшил ҳудудга айлантириш талаби ҳам Янги Тошкентдаги лойиҳаларга қўлланмайди. Шаҳарнинг 30 фоизини кўкаламзорлаштириш бош режа асосида давлат томонидан таъминланади.
Йирик сармоядорлар билан ишлашда ҳам янги ёндашув жорий этилади. Қиймати 50 миллион доллардан юқори ҳар бир лойиҳага масъул бириктирилади. У инвесторга объект ишга тушгунига қадар ҳамроҳлик қилиб, юзага келадиган масалаларни ҳал этишга кўмаклашади.
«50 миллион доллардан юқори ҳар бир лойиҳага – битта инвестиция битими» тамойили амал қилади. Битимда инвесторнинг мажбуриятлари ва таваккалчилиги ҳисобга олиниб, унга мос имтиёзлар пакети белгиланади.
Эслатиб ўтамиз, аввалроқ президент Янги Тошкентга қанча инвестиция киритилганини маълум қилганди. Янги шаҳар учун жами 20 минг гектар ер ажратилган. 2 йил аввал бу ерда бир гектарнинг ўртача қиймати 10 миллиард сўмга етмаган бўлса, ҳозирда 19 миллиард сўмни ташкил этмоқда.
