Ўзбекистон иккинчи ва учинчи АЭСни қуришни режалаштирмоқда — Мирзиёев
«Эртага янги ҳамкорларимиз ва инвесторлар билан иккинчи атом электр стансиясини қуриш масаласини муҳокама қиламиз», — деди давлат раҳбари.
Ўзбекистонда иккинчи ва учинчи атом электр станцияларини қуриш режалаштирилмоқда. Бу ҳақда Президент Шавкат Мирзиёев 16 октябрь куни ёқилғи-энергетика соҳасидаги инвесторлар билан очиқ мулоқотда маълум қилди.
Давлат раҳбари Ўзбекистонда уран ишлаб чиқариш ҳажми ошиб бораётгани, ушбу соҳага катта сармоя киритилгани ва зарур тажриба тўпланганини таъкидлади. Унинг айтишича, мамлакатда биринчи атом электр станцияси қурилиши бошланган, иккинчи ва учинчи станцияларни барпо этиш бўйича ҳам режалар мавжуд.
«Биринчи атом электр станцияси қурилишини бошладик. Иккинчи ва учинчисини қуриш бўйича ҳам режаларимиз бор. Эртага янги ҳамкорларимиз ва инвесторлар билан иккинчи атом электр станциясини қуриш масаласини муҳокама қиламиз», — деди Шавкат Мирзиёев.
Президентнинг баёнотига кўра, иккинчи станция бўйича кейинги босқичда янги ҳамкорлар билан музокаралар ўтказилади. Бироқ унинг жойлашуви, қуввати, технологияси ва қурилиш муддатлари ҳақида ҳозирча қўшимча маълумот берилмаган.
Биринчи станция Жиззах вилоятида қурилмоқда
Эслатиб ўтамиз, Ўзбекистондаги биринчи атом электр станцияси Жиззах вилоятининг Фориш туманида Россия билан ҳамкорликда барпо этилмоқда. 2026 йил 4 июнь куни Шавкат Мирзиёев ва Россия президенти Владимир Путин станциянинг биринчи энергия блоки қурилишига старт берган эди.
Лойиҳа интеграциялашган станцияни назарда тутади. У кичик қувватли модулли реакторлар ва йирик қувватли атом генерациясини бирлаштиришга асосланган. Расмий маълумотларга кўра, қурилишда хавфсизлик халқаро стандартлар ва Халқаро атом энергияси агентлиги назорати асосида таъминланиши белгиланган.
2 сентябрь куни Президентга лойиҳанинг амалга оширилиши бўйича ҳисобот тақдим этилган. Ўша вақтда реактор биноси учун котлован қазиш ишлари якунланган, бир миллион куб метрдан ортиқ тупроқ чиқарилган эди. Қурилиш майдонида 450 нафар ишчи ва мутахассис фаолият олиб бораётгани маълум қилинган.
Иккинчи станция учун ҳамкорлар изланмоқда
Иккинчи атом электр станциясини қуриш режаси аввал ҳам тилга олинган. Жумладан, 2026 йил сентябрь ойида Сербия президенти Александр Вучич Ўзбекистонда иккинчи станцияни Хитой билан ҳамкорликда қуриш режаси борлигини айтган эди. У бу ҳақда Шавкат Мирзиёев билан бўлган суҳбат мазмунини баён қилган. Бироқ бу баёнот Хитой билан қурилиш бўйича якуний келишув тузилганини англатмайди.
