Ўзбекистонликлар учун консуллик хизматлари мобил иловаси ишга тушди
Хориждаги ўзбекистонликлар энди консуллик хизматларидан мобил илова орқали фойдаланиши мумкин. Янги платформа ҳужжатларни расмийлаштириш ва зарур маълумотларни олишни енгиллаштиради.
© IZVESTIYAТашқи ишлар вазирлиги томонидан ишлаб чиқилган Consular Services мобил иловаси ишга туширилди. Янги платформа хорижда яшовчи ёки чет элга саёҳат қилишни режалаштираётган ўзбекистонликларга консуллик хизматларидан масофадан туриб фойдаланиш имконини беради.
Иловада Ўзбекистоннинг хориждаги элчихоналари ва консуллик муассасалари ҳақидаги ягона маълумотлар базаси шакллантирилган. Фойдаланувчилар дипломатик ваколатхоналарнинг манзили, алоқа маълумотлари ҳамда жойлашуви ҳақидаги долзарб маълумотларни олиши мумкин.
Шунингдек, илова орқали фуқаролар ўзлари турган давлат ёки ҳудуд қайси консуллик округига тегишли эканини аниқлаш имкониятига эга бўлади.
Лойиҳанинг дастлабки босқичида Ўзбекистонга қайтиш сертификатини расмийлаштириш, вақтинчалик ёки доимий консуллик рўйхатидан ўтиш хизматлари йўлга қўйилган.
Ташқи ишлар вазирлиги келгусида иловадаги хизматлар сонини босқичма-босқич кенгайтиришни режалаштирмоқда. Бу орқали хориждаги фуқаролар учун давлат хизматларидан фойдаланиш янада қулайлашади.
Платформанинг муҳим афзалликларидан бири анкета ва аризаларни автоматик тўлдириш тизими ҳисобланади. Унда мажбурий майдонларнинг қарийб 80 фоизи автоматик шакллантирилади.
Виза маълумотлари ҳам жойлаштирилади
Мобил иловада хорижий давлатларнинг виза талабларига оид махсус ахборот бўлими ҳам мавжуд. Ҳозирча мазкур хизмат синов режимида ишламоқда ва маълумотлар базаси доимий равишда янгиланиб бормоқда.
Иловани Android қурилмалари учун Play Market ва iOS қурилмалари учун App Store орқали юклаб олиш мумкин.
Эслатиб ўтамиз, 2026 йил йил апрел ойида хориждаги ўзбекистонликлар учун элчихоналарга онлайн навбат олиш хизмати ҳам ишга туширилган эди. Ундан Ягона интерактив давлат хизматлари портали орқали бепул фойдаланиш мумкин.
