Трамп ўзини АҚШ тарихидаги энг буюк президент деб атади

Доналд Трамп 27-август куни «Truth Social» ижтимоий тармоғида АҚШ президентлари рейтингини эълон қилди.

Рейтингда президентлар олти тоифага ажратилган: «Энг буюк», «Буюк», «Буюкликка яқин», «Ўртача», «Ўртачадан паст» ва «Муваффақиятсизлар». Биринчи тоифада фақат Доналд Трамп жой олган.

«Буюк» президентлар қаторига Авраам Линколн, Жорж Вашингтон, Франклин Рузвелт, Вудро Вилсон, Томас Жефферсон ва Эндрю Жексон киритилган.

Теодор Рузвелт, Гровер Кливленд, Жон Адамс ва Жеймс Полк «Буюкликка яқин» тоифасига киритилган.

«Ўртача» президентлар рўйхатидан Билл Клинтон, Жон Куинси Адамс, Жеймс Монро, Рутерфорд Хейс, Жеймс Медисон, Мартин Ван Бюрен, Уилям Тафт, Честер Артур, Уилям Маккинли, Эндрю Жонсон, Герберт Гувер ва Бенжамин Харрисон ўрин олган.

Энг қуйи, «Муваффақиятсизлар» тоифасига эса Жо Байден, Барак Обама, Улисс Грант, Уоррен Хардинг ва Жимми Картер киритилган. Шу тариқа Трамп уч нафар замонавий демократ президентни рейтингнинг энг охирига жойлаштирган.

Рейтингда қарийб ўнлаб АҚШ президентлари умуман тилга олинмаган. Бу эса унинг тарихий баҳолашдан кўра, сиёсий ва рамзий мазмунга эга эканини кўрсатади.

Рейтинг ижтимоий тармоқларда кенг муҳокамага сабаб бўлмоқда

Бироқ Трамп улашган рейтинг ижтимоий тармоқларда ва экспертлар орасида баҳсларга сабаб бўлмоқда.

Конспирология бўйича тадқиқотчи Майк Ротшилд Трампнинг жадвали аслида «Лифе» журнали 1948 йилда тузган рейтингга асосланганини билдирди. Унинг айтишича, кейинчалик жадвалга Трампнинг номи биринчи ўринга қўшилган ва у танқид қиладиган айрим демократлар пастки поғоналарга туширилган.

Трамп республикачи сайловчилар орасида ҳануз юқори қўллаб-қувватловга эга. Аммо унинг президентлик фаолиятига умумий жамоатчилик ва экспертларнинг муносабати бир хил эмас.

АҚШ президентлари тарихини ўрганувчи экспертлар ва тарихчиларнинг қатор рейтингларида Трамп мамлакат тарихидаги энг паст баҳоланган президентлар қаторида қайд этиб келинади.