Қатар ҳукумати президент Доналд Трамп бошчилигидаги АҚШ маъмуриятига 400 млн долларлик люкс таснифидаги Boeing 747-8 ҳаво лайнерини ҳадя қилмоқчи. Бу қарор ҳали расман тасдиқланмаган бўлса-да, Трамп буни «очиқ ва шаффоф келишув», деб атади. Унинг айтишича, самолёт вақтинча Air Force One ўрнини босади ва кейинчалик президент кутубхонаси фондига топширилади.
Ҳозирча бу масала ўрганиб чиқилмоқда, якуни қарорга келиб бўлинмаган деган Politico нашрига Қатарнинг АҚШдаги пресс атташеси ал-Ансорий.
Шундай бўлса ҳам, демократик партия вакиллари бу ҳаракатни қаттиқ танқид остига олмоқда. Конгрессмен Адам Шифф бундай совға Конституцияга зидлигини, сенатор Чак Шумер эса уни «чегара билмас коррупция», деб атади. Конгрессмен Ричи Торрес эса шошилинч этик экспертиза ўтказилишини талаб қилди.
Трамп эса демократларнинг ўзини коррупцияда айблаб, келишув давлат манфаатлари учун амалга оширилаётганини билдирди. АҚШ мудофаа вазирлиги барча харажатларни қоплашини маълум қилди.
Манбаларга кўра, совға расман Трампнинг Қатар, Саудия Арабистони ва БААга иккинчи президентлик муддатидаги илк хорижий сафари пайтида эълон қилинади. У февралда мазкур самолётни шахсан кўздан кечирган.
Айни пайтда Trump Organization Қатарда 3 млрд долларлик голф-курорт барпо этишга киришган. Компаниянинг Дубай, Жидда ва Ўмонда ҳам қимматбаҳо лойиҳалари бор. Барча активларнинг умумий қиймати 10 млрд доллардан ошган.