Абитуриентларга рухсатнома бериш бошланди
Жорий йилги давлат имтиҳонларини топшириш учун онлайн рўйхатдан ўтган абитуриентлар энди my.uzbmb.uz сайтидан шахсий идентификация рақами ҳамда паспорт серияси ва рақамини киритган ҳолда абитуриент рухсатномасини юклаб олиши мумкин.
© Bilim va malakalarni baholash agentligi2026–2027 ўқув йилида олий ва касбий таълим муассасаларига ўқишга кириш учун онлайн рўйхатдан ўтган абитуриентларга абитуриент рухсатномасини бериш бошланди. Бу ҳақда Билим ва малакаларни баҳолаш агентлиги хабар берди.
Абитуриентлар тест синовларида иштирок этиш учун абитуриент рухсатномасини my.uzbmb.uz сайтидан шахсий идентификация рақами ҳамда паспорт серияси ва рақамини киритган ҳолда юклаб олиши мумкин.
Улар тест синовига паспорт (ID-карта) ва абитуриент рухсатномаси билан белгиланган вақтдан кечикмаган ҳолда келиши лозим. Агентликнинг ёзишича, паспорт нусхаси ёки бошқа ҳужжатлар билан борган, шунингдек, имтиҳонга кечиккан абитуриентлар тест синовларига киритилмайди.
Эслатиб ўтамиз, бир неча кун олдин Олий таълим, фан ва инновациялар вазирининг буйруғи билан янги 20 дан ортиқ йўналиш ва мутахассислик очилган эди. Шунингдек, олий таълим муассасаларида дронлар, мобил робототехника, яшил иқтисодиёт, урбанистика, халқаро сув дипломатияси ва бошқа замонавий йўналишлар бўйича ҳам мутахассислар тайёрланиши маълум қилинган эди.
