Гибрид кўпаймоқда: августда автомобиль импорти қандай бўлди?
Ўзбекистонликлар сўнгги пайтларда хориждан кўпроқ гибрид автомобиллар олиб келмоқда. Уларнинг импорти ўтган ойда йиллик ҳисобда қарийб 18 баравар ошди. Йил бошидан бери хориждан келтирилган енгил автомобиллар сони 79 мингдан, уларнинг қиймати эса 1,1 млрд доллардан кўпайди.
Vaqt.uz Божхона қўмитасининг январь—август ва январь—июль учун эълон қилинган маълумотлари ўртасидаги фарқни ҳисоблаб, август ойининг ўзидаги автомобиль импорти ҳажмини аниқлади.
Ҳисоб-китобга кўра, августда Ўзбекистонга 13 214 та енгил автомобиль олиб кирилган. Бу 2025 йилнинг шу ойидаги 9 885 та автомобилга нисбатан 33,7 фоиз кўп.
Импорт қиймати эса 109 млн доллардан 182,6 млн долларга етиб, 67,6 фоизга ошган. Яъни августда автомобиллар импорти қиймат жиҳатидан уларнинг сонига қараганда икки баравар тезроқ ўсган.
Асосий ўсиш гибридлар ҳисобига юз берди
Август ойида Ўзбекистонга 3 054 та бензин ва электрда ҳаракатланувчи гибрид автомобиль импорт қилинди. Бир йил аввал бу кўрсаткич атиги 173 тани ташкил этганди.
Шу тариқа, гибрид автомобиллар импорти бир ойда қарийб 18 баравар ошган. Уларнинг умумий қиймати ҳам 7,1 млн доллардан 56,8 млн долларга — қарийб саккиз баравар кўпайган.
Бензинли автомобиллар импорти эса 1 646 тадан 2 083 тага ёки 26,5 фоизга ошди. Уларнинг қиймати 36,2 млн доллардан 38,6 млн долларга кўтарилган.
Натижада августда гибрид автомобиллар бензинли машиналардан 971 тага кўп импорт қилинди. Уларнинг импорт қиймати ўртасидаги фарқ ҳам гибридлар фойдасига 18,2 млн долларни ташкил этди.
Бироқ саккиз ойлик умумий натижада бензинли автомобиллар ҳали ҳам олдинда: йил бошидан бери 13 070 та бензинли ва 11 130 та гибрид автомобиль олиб кирилган. Қиймат бўйича эса фарқ анча қисқарган — мос равишда 246,9 млн ва қарийб 240 млн доллар.
Электромобиллар импорти августда деярли ўсмади
Электромобиллар ҳамон импортнинг энг катта қисмини ташкил қилмоқда. Августда Ўзбекистонга 8 076 та электромобиль олиб кирилди. Бу барча импорт қилинган енгил автомобилларнинг 61,1 фоизига тенг.
Бироқ ўтган йилнинг августида ҳам 8 062 та электромобиль импорт қилинганди. Демак, уларнинг сони бир йилда атиги 14 тага ёки 0,2 фоизга ошган.
Шу билан бирга, электромобиллар импорти қиймати 65,4 млн доллардан 87,2 млн долларга ёки 33,2 фоизга кўпайди. Бу августда олиб кирилган электромобилларнинг ўртача импорт қиймати бир йил аввалгидан юқорироқ бўлганини кўрсатади.
Саккиз ойлик ҳисобда эса электромобиллар импортидаги ўсиш юқорилигича қолмоқда. Уларнинг сони 28 920 тадан 54 826 тага ёки 89,6 фоизга ошган. Бироқ август натижаси йил бошидаги юқори ўсиш суръати сўнгги ойда давом этмаганини кўрсатмоқда.
Саккиз ойда 79 мингта автомобиль импорт қилинди
2026 йилнинг январь—август ойларида Ўзбекистонга жами 79 046 та енгил автомобиль импорт қилинди. Бир йил аввал бу кўрсаткич 42 197 тани ташкил этганди. Импорт ҳажми бир йилда 36 849 тага ёки 87,3 фоизга ошган.
Енгил автомобиллар импортининг умумий қиймати эса 639,2 млн доллардан 1,1 млрд долларга етди. Ўсиш 463,7 млн доллар ёки 72,5 фоизни ташкил этди.
Импорт қилинган автомобилларнинг:
54 826 таси электромобиль;
13 070 таси бензинли;
11 130 таси гибрид;
20 таси дизелли автомобиллар ҳиссасига тўғри келган.
Электромобиль ва гибридлар биргаликда жами импортнинг 83,4 фоизини ташкил этди. Бир йил аввал уларнинг улуши 73,3 фоиз эди.
Миқдор қийматдан тезроқ ўсгани сабаб битта енгил автомобилнинг ўртача импорт қиймати 15,1 минг доллардан 14 минг долларгача пасайган. Бу чакана савдо нархи эмас, божхона маълумотларидаги умумий қиймат асосида ҳисобланган ўртача кўрсаткичдир.
